L’ASSEMBLADA OCCITANA, QU’ES AQUÒ?


L’Assemblada Occitana es una associacion de lei 1901 qu’a per objectiu  rassemblar totas las fòrças vivas de la societat occitana (valent adire: las fòrças de tota mena de collectius, entitats, grops, laboratòris d’idèas, movements, organizacions, partits politics e autras estructuras; e tanben las fòrças individualas) per fin de complir las finalitats seguentas:

  • La reconeissença de la nacion occitana, dins sa pluralitat lingüistica e culturala, e la presa de consciéncia del pòble occitan d’i aperténer.
  • L’aveniment d’una economia occitana sobeirana, dinamica, ecologica e sociala.
  • Crear las condicions politicas e socialas necessàrias per establir e constituir una vertadièra entitat territoriala occitana pròpria, que siá plurala, federativa e democratica.
  • Promòure e desvolopar la cultura e la lenga occitanas; obténer per l’occitan un estatut de lenga oficiala e la generalizacion de son ensenhament a totes los nivèls.
  • Restaurar la dignitat nacionala del pòble occitan. L’Associacion pensa que l’independéncia d’Occitània es un mejan necessari per restaurar aquela dignitat (en passant per una autodeterminacion democratica).
  • Defendre las personas (fisicas e moralas) que subisson de discriminacions, de tractaments inequitables, de vexacions, d’injúrias, de difamacions o de violéncias a causa de lor cultura occitana, de lor usatge de la lenga occitana, de lor accent occitan o de lor origina occitana; e se constituir partida civila per defendre aquelas personas.

 

L’Assemblada Occitana es pas un parlament simbolic!

Es una associacion que regula sas activitats en acòrdi amb sos estatuts e amb aqueles que regís la lei del 01/07/1901 e lo decret del 16/08/1901.

 

L’Assemblada Occitana es pas un partit politic!

Demòra totalament independenta de quin que siá partit politic e a pas vocacion de se presentar a las eleccions.

 

L’Assemblada Occitana es pas un collectiu culturalista!

Son objècte es clarament politic.

 

L’Assemblada Occitana es pas una entrepresa!

Sa tòca es pas lucrativa.

 

La participacion a l’Assemblada se fa a títol individual. 

Per devenir sòci de l'Assemblada, vos podètz marcar sus aquel sit, en picant dejós: