Trebes e Carcassona: dreches contra lo terrorisme salafista e jihadista


Comunicat · 26.03.2018

L’Assemblada Nacionala Occitana (ANÒC) rend omenatge als quatres mòrts e als ferits que son estats victimas de l’insuportable atemptat terrorista del 23 de març, a Trebes e Carcassona. Adreiçam nòstra compassion e solidaritat a las familhas e als amics. Exprimissèm nòstra admiracion e nòstra reconeissença a Arnaud Beltrame, luòctenent-coronèl de la gendarmariá, qu’es mòrt en eròi après se substituir als ostatges de Trebes. Per son coratge e son sacrifici, Arnaud Beltrame a salvat la vida de mai d’una persona.

 

Un còp de mai, los terroristas salafistas-jihadistas an atacat la populacion occitana de maniera òrba e crudèla. Nos atacan aicí en Occitània coma atacan de milièrs d’innocents dins d’autres païses del Mond.

 

Nos tenèm al costat de las fòrças de l’òrdre que combaton los terroristas.

 

L’ANÒC, de segur, desapròva generalament las derivas seguretàrias e l’utilizacion de la menaça terrorista coma pretèxt per impausar de leis liberticidas; ça que la, nos interrogam sus la manca de vigilància de l’estat francés qu’identifica fòrça salafistas-jihadistas mas que los neutraliza pas d’avança. Radwan Lakdim, lo terrorista de Trebes e Carcassona, èra conegut dels servicis de polícia per de faches de criminalitat e èra fichat “S”. Es pas lo solet cas de laxisme de las autoritats francesas devèrs los individús radicalizats (vejatz l’atemptat de Niça). Nos interrogam doncas cossí lo govèrn poiriá melhorar la prevencion d’aquelas atacas sens esperrecar tròp l’estat de drech.

 

Enfin, l’ANÒC denóncia amb vigor los mitans del salafisme-jihadisme que se son installats dins nòstre país d’Occitània. Mesprèsan la vida umana, la patz e la convivéncia. Sèm partisans de la susvelhança e de la repression d’aqueles sectors. La lucha contra lo salafisme-jihadisme, dins nòstre país, deu aver d’objectius tant elevats coma la politica antinazi en Alemanha o coma la politica antimàfia en Itàlia.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org