Solidaritat dab los salariats de l’usina Ford de Blancafòrt

Comunicat · 11.12.2018

Fòto: Ouest-France
Fòto: Ouest-France

L’Assemblada Nacionala Occitana que sostien los salariats de l’usina Ford de Blancafòrt (Gasconha) davant lo perilh de barradura deu sit. Los trabalhadors de Blancafòrt qu’an desvolopat un sit industriau hòrt beròi dempuish quauques decennis. Qu’ei lo solet sit de construccion automobila en Occitània.

 

Aquera usina non ei pas en dificultat particulara, mes que subish la concurréncia absurda d’autas usinas d’Euròpa Centrala ont lo còst de trabalh ei mens car. E, donc, Ford que vòu desplaçar la sua produccion cap aus autes sits centreuropèus. Aquò qu’ei ua injustícia per los salariats de Blancafòrt qui trabalhan dempuish de longas annadas en ofrir au país ua activitat eficaça, performanta e de nauta qualitat, dab emplecs segondaris induits.

 

Qu’exigishèm, dab los salariats de Blancafòrt, que Ford non quite pas lo nòste país sens garentir solucions de remplaçament dignas. Un plan de represa de l’entrepresa bèlga Punch que poiré dar quauque espèr, mes qu’i cau hicar garentidas mei hòrtas entà guardar los emplecs e mantiéner bonas condicions de trabalh.

 

Mei generalament, l’Assemblada Nacionala Occitana b’afirma que los poders politics e deven lutar e har pressions eficaças sus las granas companhias mondialas coma Ford entà que respècten lo país e que non abandonen pas los lors salariats.

 

Lo ministre francés Bruno Le Maire que pretend que vòu sauvar lo sit dab los sindicats. Que hàcia donc las pressions politicas necessàrias. L’accion politica, civica e economica que deuré passar abans los interès de las granas entrepresas internacionalas.

 

Un poder descentralizat hòrt, dens ua Occitània autonòma o independenta, que garentiré ua melhora defensa deus interès economics e sociaus deu nòste país.

 

***

 

Units per Occitània

 

***

 

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org