Respectatz las mesuras de confinament! Non aus comportaments irresponsables!

Fòto: UL CGT DUNQUÈRCA
Fòto: UL CGT DUNQUÈRCA

Comunicat · 18.03.2020

Dempuish que, diluns 16 de març, las mesuras sevèras —e justificadas— de confinament e son estadas presas per lo govèrn francés, malaürosament, que’ns cau constatar que son violadas per milèrs de personas.

 

De hèit, Occitània, Bretanha a mei quauques regions de lenga e cultura d’oïl que coneishen dempuish ièr ua andada de món venguts mei que mei deu virat de París, qui, en bravant lo decret governamentau, e desforrèlan sus aquestas tèrras on tienen generalament residéncias segondàrias. Que vienen au mesprètz deu risc de carrejar lo virus Covid-19 e de contaminar zònas qui son encara —relativament— protegidas.

 

En Occitània, aqueste fenomèn que tòca mei que mei Gasconha, Peiregòrd, Lemosin, Provença e lo País Niçard e que va creishent. Aqueras populacions, ricas en generau, mespresosas deu dangèr qui carrejan, qu’encarnan a la perfeccion lo supremacisme de certans francés rics e lo mesprètz de classa contra lo país qui botan en dangèr.

 

Que raperam, de hèit, que la remarcabla gestion de la crisi sanitària per la region de Nava Aquitània —gestion assegurada en autonomia per rapòrt a las mesuras deu govèrn francés— qu’avèva permés ua relativa proteccion de l’Occitània occidentala. Aqueste trabalh de prudéncia, de segurizacion, que risca anueit d’estar mes en causa per lo comportament incivic inacceptable de quauques inconscients. Davant aqueth problèma, lo govèrn francés que muisha incúria, qu’ei confit dens la sua logica unitària centrada sus l’Illa de França, que gaita e que dèisha har, que refusa de contrarotlar las concentracions riscadas de món dens las garas.

 

L’Assemblada Occitana, fidèla a la tradicion etica de las regions occitanas, que condemna absoludament tota traca de xenofobia, de racisme o de regèt de l’aute. Mes l’Assemblada Occitana que condemna tot parièr tota traca de supremacisme francés, e lo mesprètz de part deus qui tienen poder.

 

L’Assemblada Occitana que deplora tanben las actituds irresponsablas de certans occitans: daubuns que’s rassemblan au mesprètz de las mesuras de precaucion, que hèn ràtzias dens los supermercats e que dan un marrit exemple (coma la preséncia irresponsabla deu cònsol de Niça a una messa ont s’ei probablament hèit contaminar).

 

ASSEMBLADA OCCITANA

  

Sèti: Ais de Provença

Sit: www.assemblada.org

E-mail: info@assemblada.org