Per la biodiversitat en Occitània e dins lo Mond entèir


Comunicat · 01.04.2018

(fòto: PBS)

 

D’estudis scientifics recents confirman que nòstre environament se degrada e que nòstra biodiversitat es de mai en mai menaçada, aicí en Occitània e dins la rèsta del Mond.

 

  • L’amainatjament de las tèrras amb la rurbanizacion creissenta fan baissar considerablament lo nombre d’aucèls dins las planuras dempuei un desenat d’ans.
  • Las abelhas contunhan de se rarificar a causa dels produits quimics de mai en mai agressius dins l’agricultura. Las capacitats de pollinizacion baissan e d’espècias vegetalas ne venon menaçadas a lor torn.
  • Los sòls se fragilizan dins tots los país del Mond a causa de l’artificializacion de las tèrras e de las pollucions acomoladas.
  • En general, las activitats umanas, per manca de contraròtle, menan la Tèrra vèrs una extincion massissa d’espècias.

 

Aquelas notícias mauvaisas s’addicionan a tantas autras sus l’environament (chamjament climatic, remonta del nivèl de las mars, etc.).

 

L’Assemblada Nacionala Occitana (ANÒC) sosten los expèrts e las organizacions de defensa de la natura que trabalhan sus lo terren per sauvar los equilibris. L’amainatjament del territòri, lo desvolopament industrial e lo dinamisme economic son legitims, mas devon èsser enquadrats, sostenables e compatibles amb la biodiversitat.  

 

Es urgent de crear de zònas santuarizadas per las espècias e los ecosistèmas en perilh, coma o preconizan los estudis scientifics recents.

 

Es una bona causa que los poders publics assagen de responsabilizar los ciutadans. Mas los ciutadans fan ja d’esfòrç remarcables e aderisson de mai en mai a la morala ecologica individuala. Ara, lors esfòrç sufison pas.

 

Los poders publics (nacionals e internacionals) devon assumir pus seriosament lors responsabilitats collectivas en impausant de santuaris de biodiversitat, de nòrmas de produccion verament ecologicas e d’amainatjaments verament sostenables.

 

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org