Patrimòni: avisatz lo massacre de la lenga occitana, agachetz pas sonque lo fuòc de Notre-Dame de París

(Fòto: RTL)
(Fòto: RTL)

Comunicat · 15.04.2019

L’Assemblada Occitana es sensibla al fuòc que destrutz la catedrala Notre-Dame de París. Es un drama cultural inacceptable. Coma occitans, testimoniam tota nòstra solidaritat a la populacion francesa (“del nòrd”) e als abitants de París en particular.

 

Mas devèm ramentar qu’un autre drama cultural se desròtla en parallèl. Aquel drama, es la politica d’eliminacion sistematica de la lenga occitana de part de l’estat francés, en particular dins las escòlas (especialament amb las reformas recentas orquestradas per Macron e Blanquer, per Hollande e Vallaud-Belkacem).

 

Ausirem dins los jorns venents de dichas esmogudas —e justificadas— sus lo fuòc de Notre-Dame de París. Mas ausirem pas res dins los mèdias sus l’exterminacion en cors de nòstra lenga occitana e de nòstra prestigiosa cultura d’òc. E pasmens aqueste escàndol se passa ara meteis, davant vòstres uèlhs.

 

Malgrat l’estofament mediatic e politic, contunharem lo combat eroïc per salvar nòstra lenga occitana e per far valer los dreches del pòble occitan.

 

A totes los amoroses de la cultura que se mobilizaràn —amb rason— per rebastir Notre-Dame de París, lor suggerissèm una causa: que s’engatgen tanben, en parallèl, per parlar occitan, per far parlar occitan e per finançar los projèctes culturals d’òc.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org