Las valors democraticas e umanistas del movement occitan


Comunicat · 06.06.2018

Las valors istoricas e tradicionalas del movement occitan son:

  • la defensa dels drechs del pòble e dels interès del país,
  • la democracia,
  • l’umanisme,
  • lo respècte de l’environament.

Son las valors dels tres grands pensaors de l’occitanisme que son Frederic Mistral, Robèrt Lafont e Francés Fontan. Son las valors de l’Assemblada Nacionala Occitana (ANÒC).

 

Dins lo movement occitan, l’ANÒC encoratja l’expression de totas las tendéncias politicas que son clarament democraticas e umanistas, per exemple:

  • l’ecologisme,
  • l’anarquisme,
  • lo comunisme e lo socialisme democratics,
  • la socialdemocracia,
  • lo centrisme,
  • lo liberalisme umanista,
  • lo conservatisme umanista...

Per tant, ramentam que certanas tendéncias politicas rèstan incompatiblas amb las valors de l’occitanisme. Refusam en particular:

  • Totas las formas d’òdi en general (racisme, chauvinisme, masclisme, omofobia...).
  • L’extrèma drecha (nacionalpopulisme, neofaissisme, neonazisme, idelologia roja-bruna...).
  • Certans corrents autoritaris que deforman lo comunisme (stalinisme, maoïsme, juche, interpretacions autoritàrias del leninisme e del trotzkisme).
  • Lo fanatisme religiós (salafisme, jihadisme, integrisme catolic o protestant...).
  • Lo conservatisme ultrareaccionari que s’opausa al feminisme, als omosexuals e a la diversitat religiosa e sociala...
  • Lo capitalisme sauvatge que fisa lo poer a de grandas bancas e a de lobbys.
  • Las tecnocracias qu’eschapan al contraròtle dels ciutadans.

 

Vejam quauques exemples: certanas personas e organizacions utilizan la lucha còntra lo capitalisme coma pretèxt per justificar los crimes de Lenin, Mao Zedong o Stalin. D’autras se siervon de la denóncia de l’imperialisme american o israelian per justificar totas menas de derivas sectàrias e religiosas. Aquelas posicions son de segur inacceptablas. Tant, trobam legitim de criticar l’imperialisme, lo capitalisme sauvatge e lo neoliberalisme desumanizat; tant, non poèm pas admetre de modèls politics responsables de la mòrt de milions de gents.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org