L’extrèma drecha, un perilh per Occitània!


Comunicat · 09.04.2018

Occitània sembla de venir de mai en mai una “tèrra promesa” de l’extrèma drecha e es fòrça inquietant. Ja dins lu ans 1990, es dins de comunas de Provença que son elejudi li primieri municipalitats Frònt Nacionau (FN), cen que dona a aquesta region la mala fortuna de devenir un bastion d’aqueu partit.

 

Dementre que si faïan li diferenti votacions presidenciali, legislativi e municipali, lu resultats de l’FN an progressat, non pus solament en Provença, mas tanben en Lengadòc qu’èra tèrra tradicionalament de senèca.

 

Mas lo desvolopament de l’extrèma drecha en Occitània non si resumisse au vòte FN. De mai en mai, de gropusculs de drecha radicala noirisson la cronica en Occitània tota.

  • En Lengadòc un movement identitari comete d’agressions creissenti, especialament en Cevenas ò mai a Montpelhièr còntra lu estudiants que faïan la cauma.
  • Dins la mesma region, a la Salvetat d’Agot (Eraur), s’es installat un grop musicau femenin ligat a una sècta ocultista d’ultradrecha. Que s’illustra per de cançons pròpi racisti, antisemiti, xenofòbi, omofòbi e a la glòria de Vladimir Putin.
  • A Ais de Provença, l’Accion Francesa comete d’accions violenti sota de discors pseudooccitanistas e pseudoregionalistas.
  • A Marselha i son de tensions a l’entorn dau “Bastion Sociau”, un gropuscul d’extrèma drecha fondat sus lo modèl de “Casapound” en Itàlia.
  • A Niça, lu identitaris, dont la preséncia es mai anciana, an longtemps provat de si recuperar lu simbòls culturaus e istorics de la vila en aprofechant una comunicacion eficaça e de succès ai votacions locali en lu ans 2000, denant de declinar. Devengut aüra mai confidenciau, lo movement consèrva pura un locau en vila.

 

Aquela evolucion tròba li sieus raïç dins lo malèstre sociau (caumatge, desraïçament), la negacion de l’occitanitat per l’estat francés, la confiscacion de la sobeiranetat populara e la decepcion generalizada devèrs la classa politica convencionala qu’a finit que s’es discreditada ai uelhs de l’opinion publica. D’efiech, aquela classa politica a fach de promessas electorali jamai tengudi e a creat d’escàndols constants de corrupcion sempre impunits, dins un contèxt de desregulacion economica e sociala. Aqueu problèma constituisse un terren fertil au desvolopament de l’extrèma drecha e mai largament de toi lu movements complotistas que prospèran sus Internet.

 

L’Assemblada Nacionala Occitana (ANÒC) denóncia l’extrèma drecha e toi lu extremismes fanatics quau que sigan, e deplòra que s’espandiscan en tèrra occitana. Considèra pura qu’es necessari de tenir còmpte de toi lu factors que contribuisson a aquela expansion e d’orientar toi lu decebuts de la politica francesa devèrs un combat mai just e mai positiu. Li occitanas e lu occitans temptats per l’extremisme fanatic devon acapir qu’es lo nacionalisme supremacista francés que promòu l’extrèma drecha, e ensinda constituisse una menaça per la convivéncia entre comunautats e per l’avenir de la lenga e la cultura nòstri; non portarà minga solucion ai problèmas quotidians que lu pertòcan.

 

L’ANÒC apara de valors de patz, de tolerància e de justícia sociala. E entende de combatre toti li ideologias extremisti-fanatiqui, que son de vectors de toti menas d’òdis, d’exclusions e de discriminacions.

 

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org