L’ANÒC que demanda comptes a l’ÒPLO per la sua decision qui a miat a la barradura de la societat d’edicion en occitan Vistedit


Comunicat · 28.8.2018

L’Assemblada Nacionala Occitana (ANÒC) que s’indigna de la darrèra declaracion de Patric Ros a prepaus deu jornau la Setmana. Entrevistat sus Ràdio País, lo vicepresident de l’Ofici Public de la Lenga Occitana (ÒPLO), d’efieit, qu’a justificat la barradura d’aqueth jornau en afirmant que non avèva pas nat abonats e pas nat aviéner. Aquera afirmacion non sembla pas de correspóner a la realitat: segon Bregida Bouncer, de la societat Vistedit, lo jornau que comptava 700 abonats aperaquí a la sua barradura.

 

Dens la medisha entrevista, Patric Ros tanben qu’a ahortit que lo trabalh de las associacions non èra pas eficaç tocant la defensa e la promocion de la lenga e de la cultura occitanas; segon eth, que deven estar presas en carga per l’administracion publica. Qu’èm d’acòrdi que las regions e prengan las lors responsabilitats, mes qu’ac hàcian meilèu en ajudar los qui trabalhan qu’en los escanar.

 

A aquera escasença, Patric Ros qu’a anonciat que l’ÒPLO e haré ua crida entà tornar lançar un navèth jornau en occitan. L’ANÒC que’s mòstra fòrça perplèxa e dubitativa pertocant aquera declaracion e aqueth projècte. Qu’i suspècta ua volontat escura de l’ÒPLO de contrarotlar tot instrument de difusion de l’occitan en provocant la barradura d’un jornau qui èra encara independent.

 

Per remembrança, l’ÒPLO qu’a miat a la barradura la societat Vistedit (qui publicava la Setmana, DVDs e revistas en occitan tà la mainadèra) en decidir d’arrestar de la subvencionar jos pretèxts fallaciós. Aquera decision qu’aurà consequéncias de las grèvas sus l’aviéner de la socializacion e de l’ensenhament de l’occitan.

 

L’ANÒC que demanda publicament, exprèssament e sens relambi a l’ÒPLO:

  1. Ua vertadèra responsabilizacion deus elegits dens las decisions de l’ÒPLO, en liason dab los usatgèrs.
  2. Lo restabliment de la societat Vistedit e de las soas publicacions.
  3. La garentida de l’independéncia deus organs que l’ÒPLO e subvenciona.
  4. Ua totala transparéncia dens los procès de decision de l’ÒPLO.
  5. L’installacion d’un vertadèr contrapoder independent dens los sons organs de decision, en associar usatgèrs e elegits.
  6. Ua redaccion e ua publicacion regulara de rapòrts publics sus l’impacte de las decisions de l’ÒPLO.
  7. Ua definicion clara vienent de las regions deus lors objectius entaus mèdias en occitan.
  8. La coneishença e l’emplec de l’occitan per tots los membres de l’ÒPLO: non trobam pas normau qu’ua persona dirigenta de l’ÒPLO non sia pas occitanofòna.
  9. L’ajustèr dens los estatuts d’ua mençon hasent de l’occitan la lenga de trabalh intèrna e de comunicacion extèrna de l’ÒPLO.

L’ANÒC qu’exigish tanben deus elegits engatjaments politics suu montant de las subvencions publicas destinadas a l’occitan, cada an, e sus la lor reparticion, entà sostiéner la comparason dab las autas lengas e culturas minorizadas.


 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org