L’òdi antioccitan es tan grèu coma l’òdi antisemita

Comunicat · 19.02.2019

L’Assemblada Occitana ramenta que, dins l’estat francés, i a un òdi antioccitan que chal denonciar coma òm denóncia l’antisemitisme. L’antiracisme se devesís pas, tots los tipes de racismes los chal combatre a l’encòp.

 

Un estudi recent indica que las atacas antisemitas an aumentat d’un 74% dins l’estat francés en 2018. Los imatges de la granda feminista occitana Simona Veil son recobèrts per de crotz gammadas. Lo president d’Eraur, l’occitan Kleber Mesquida, ven de recebre una injúria antisemita (acompanhada d’una injúria sexista contra Caròla Delga). L’intellectual francés Alain Finkielkraut a subit una menaça antisemita a París en public.

 

Evidentament l’Assemblada Occitana condemna aquò e exprimís sa solidaritat totala amb tots los josieus que subisson l’òdi racista.

 

La luta justa contra l’antisemitisme deu pas far oblidar que i a maitot, a l’encòp, ara mesme, a bèls uelhs vesents, un òdi antioccitan que s’exprimís de mai en mai, sens gran de vergonha.

 

D’efieit, l’estat francés assaja d’eradicar los cors d’occitan dins l’ensenhament public: o fai agora sos lo ministre de l’educacion Blanquer, coma o a fait recentament sos la ministra Vallaud-Belcacem; amb l’aprobacion de l’actual president Macron, coma de l’ancian president Hollande.

 

Lo rector d’acadèmia d’Ais-Marselha a pretendut que l’occitan (lo provençal) se parlariá pas e qu’aquò vaudriá pas la pena de l’ensenhar. Aquela declaracion es d’un cinisme absolut quand sabèm qu’òm secutèt e traumatizèt sovent los enfants que parlavan occitan a l’escòla dels ans 1880 a 1950.

 

La politica escolara francesa es ben la primèira responsabla de la reculada de l’usatge de l’occitan, agora coma dins lo passat.

 

I chal apondre los estereotipes e las trufariás innombrablas contra los occitans (los “meridionals”) difusats per quauque elèit parisenc dempuei longtemps.

 

Los democratas se mobilizan amb rason contra lo racisme antijosieu, antinegre, antimaugrabin, antiginato o antiasiatic... Mas tanben, aqueles mesmes democratas se devon mobilizar contra l’òdi antioccitan. Se devon mobilizar per defendre la lenga occitana e per qu’en Occitània, dels Alps a l’Atlantic, ajam dreit de viure dignament amb nòstra personalitat occitana (“meridionala”), sens subir mai de vexacions.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org