Eleccions europèas: un acte civic occitan es possible

Comunicat · 25.05.2019

L’Assemblada Occitana planh que las eleccions europèas sián pesteladas, ferrolhadas e emb pauc d’espèr. Lo Parlament Europèu d’Estrasborg a daus poders tròp limitats, que lo poder reau de l’UE es entre las mans daus estats e daus lobbys. Las institucions europèas decebon fòrça las aspiracions democraticas daus ciutadans. Per exemple Brussèlas sosten cinicament l’estat espanhòu contra la volontat d’independéncia daus catalans.

 

L’Assemblada Occitana revendica au minim l’usatge oficiau de las lengas minorizadas, lor ensenhament garentit e lo drech d’autodeterminacion daus pòbles. Pas una lista o prepausa a las eleccions europèas (aumens dins l’enchastre francés).

 

L’Assemblada Occitana encoratja de far un acte civic per defendre los drechs dau pòble occitan e per i portar nòstras idèas d’emancipacion nacionala, de justícia sociala e de defensa de l’environament.

 

Dins aquesta logica existisson quauques opcions de vòte. Vaicí çò qu’es possible de far dins l’estat francés.

  • Es possible de votar per la lista ecologista EELV que recep lo sosten dau Partit Occitan. Pr’aquò deploram que los candidats autonomistas i sián dins de las posicions quasi inelegiblas. Maitot i planhèm las proposicions minimalistas que se limitan a aplicar la Charta Europèa de las Lengas Regionalas e Minoritàrias. Òr, aquela charta garentís pas de proteccion eficaça a las lengas.

En tot cas, l’Assemblada Occitana crida a refusar la lista Macron-LREM perque es menada per Nathalie Loiseau: aquela persona es una enemija declarada de las lengas minorizadas e una anciana militanta d’extrèma drecha. Tanben condemnam lo president Macron que sosten aquela lista en nom de la “lucha contra lo nacionalisme”. Òr, en realitat, lo quite Macron mena una politica ultrachauvina francesa que reprimís l’ensenhament de las lengas minorizadas. Tanben Macron e LREM son deficients sus l’environament e la justícia sociala.

 

Evidentament, demandam de barrar la rota, tanben, a totas las autras listas que son dobèrtament per lo chauvinisme francés e contra las lengas minorizadas. Chau combatre las listas chauvinistas francesas de Glucksmann (PS), Bellamy (LR), Mélenchon e Aubry (LFI), Le Pen (RN-FN), Dupont-Aignan (DLF) o Asselineau (UPR)...

 

Dau costat d’Aran demandam de votar per las listas favorablas a la causa occitana e catalana: son las listas ÈRC e Ensems per Catalonha (JxC). E chau combatre lo chauvinisme espanhòu de Vox, dau PSÒE-PSC, de Ciutadans e dau PP entretant... 

 

Dau costat de las Valadas Occitanas (estat italian), chau combatre lo chauvinisme italian de Salvini e de la Liga, de l’M5S e de Fratelli d'Italia... e maitot tots los partits italians corromputs. Remarcam la preséncia de la lista Autonomias per Euròpa, menada per daus autonomistas de la Vau d’Aosta.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org