Dab los independentistas catalans jutjats a Madrid, entà la libertat de Catalonha

 (fòto: el Nacional)
(fòto: el Nacional)

Comunicat · 12.02.2019

L’Assemblada Occitana que sostien los presoèrs politics catalans qui començan d’estar jutjats uei a Madrid. Aqueths que son confrontats a acusacions absurdas vienent de l’aparelh d’estat espanhòu. Qu’an solament exprimit que vòlen installar, sens violéncia, l’independéncia de Catalonha. B’an dreit d’exprimir aquera aspiracion legitima.

 

Las Nacions Unidas be parlan deu dreit deus pòbles a l’autodeterminacion. Uei Espanha que deu reconéisher aqueth dreit aus catalans.

 

L’Assemblada Occitana que sostien tanben tots los patriòtas catalans qui contunhan de trabalhar entà l’independéncia de Catalonha. Que sostienèm en particular los militants de terren qui subishen vexacions innombrablas de part de l’estat repressiu espanhòu. Que sostienèm tanben los responsables catalans exiliats a l’estrange a l’entorn de Carles Puigdemont.

 

Que sostienèm evidentament los nòstes compatriòtas occitans de la Vath d’Aran qui collabòran dab lo movement catalan de liberacion. L’independéncia de Catalonha que pòt estar lo parat de har ua Republica de Catalonha e Aran. Que portaré mei respècte a la Vath d’Aran e mei sostien a la lenga occitana.

 

L’Assemblada Occitana que contunha de’s tiéner au costat deu son movement hrair, l’Assemblada Nacionala Catalana (ANC). Que cridam tots los democratas a sostiéner lo dreit deus catalans e deus occitans aranés de víver liures.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org