Corsets jaunes, sindicats, ecologistas e fòrças de l’òrdre: per la justícia, per la convergéncia de las lutas, contra la violéncia

(Fòto: Acrimed)
(Fòto: Acrimed)

Comunicat · 30.04.2019

A l’ocasion del 1r de mai, l’Assemblada Occitana exprimís tornarmai son sosten a las revendicacions socialas dels corsets jaunes e dels trabalhadors en general.

  • Per una fiscalitat suportabla e equitabla.
  • Per que las gents de las classas mejanas e popularas pòschan anar al trabalh en veitura sens se roïnar en benzina.
  • Per acorchar las distàncias entre luòcs de residéncia e de trabalh.
  • Per la transparéncia de la vida politica.
  • Per una gestion descentralizada dels servicis publics e del desvolopament economic: volèm una politica pròcha dels ciutadans e de las regions.
  • Per metre fin a la desertificacion de las campanhas, en lor donant d’esquipaments publics complets amb d’oportunitats realas de desvolopament.
  • Per la convergéncia de las lutas legitimas entre corsets jaunes, ecologistas e sindicats.
  • Per lo retorn als 90 km/h sus las estradas nacionalas (sens renonciar als imperatius de la seguretat estradèira).

Lamentam que lo President Macron, dins son discors mancat del 25 d’abril, rèste sord a las revendicacions principalas dels corsets jaunes. Condemnam la manipulacion e la censura del pretendut “grand debat”. Tanben sèm en colèra perque Macron refusa de reconéisser las minoritats etnolingüisticas, qu’es totun una revendicacion clarament exprimida dins lo “grand debat”.

 

Cridam los corsets jaunes e las fòrças de l’òrdre a la compreneson mutuala. Los corsets jaunes an lo dreit legitim d’exprimir lor colèra sociala.

  • La mission de las fòrças de l’òrdre es de garentir la seguretat dels manifestants, non pas de los reprimir. Exigissèm que los policièirs e gendarmas agischan amb discerniment e dins lo respècte dels dreits umans. Sus aquò, condemnam los òrdres escandalós de repression que l’estat transmet als policièirs e gendarmas.
  • Mas en parallèl, los corsets jaunes devon facilitar un raprochament amb los policièirs e gendarmas de bona volontat. Chal trobar una endevenença amb los gendarmas e policièirs que lutan per de condicions de trabalh melhoras. Demandam als corsets jaunes d’evitar los elements violents, extremistas e provocaires. Sèm pas d’acòrdi amb certans corsets jaunes que cridan als policièirs “Suicidatz-vos.” Al contari sostenèm aqueles autres corsets jaunes, pus visionaris, que cridan als policièirs: “Vos suicidetz pas, rejonhètz-nos!”

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org