Chaça al visc dels aucèls: l’Assemblada Occitana ditz de non!


Comunicat · 16.02.2019

(Fòto: Kathy2408/Pixabay, sit Animalaxy.fr)
(Fòto: Kathy2408/Pixabay, sit Animalaxy.fr)

Lo 28 de decembre passat, lo Conselh d’Estat francés a confirmat una autorizacion de la chaça dels aucèls en Provença-Alps-Còsta d’Azur (Occitània orientala).

 

La chaça al visc es una tecnica de chaça tradicionala que consistís a botar de peja fòrta sus de baguetas o de branchas d’arbres, arbusts o boissons, que dessús se venon empejar d’aucèls agantats per lo chant d’autres aucèls en jàbia. La tòcha es de capturar essencialament de tordres e de mèrles.

 

Enebia en 2009 per una directiva europèa còntra los “metòdes de captura o de mesa a mòrt massissa e non selectiva” d’aucèls, la chaça al visc faguèc l’objècte d’una temptativa d’interdiccion en França en 2014 e 2015. Malgrat la directiva de l’Union Europèa, que prevei totun de derogacions, aquela practica es encara toleraa en nom de la tradicion. Lo 26 de junh de 2018, a l’iniciativa de la deputaa ecologista Laurence Abeille, s’adoptèc en comission un emendament per fin d’interdire la chaça al visc dins l’enchastre del projècte de lei sus la biodiversitat.

 

Aquela tecnica de chaça non selectiva a de grèvas consequéncias sus la biodiversitat mentre qu’aquela se prefonda: de desenats de miliers d’aucèls apertenent a d’espècias protegias ne son victimas e, dins certans cas, subisson de damatges irreversibles.

 

A l’origina de la demanda d’abrogacion de l’arrestat, la Liga de Proteccion dels Aucèls (LPO en francés) a anonciat lo 3 de genier passat qu’a fach sa denóncia còntra l’estat francés davant la Comission Europèa.

 

D’autras espècias animalas son victimas d’aquela tecnica de chaça e de tota mena d’autres trabuchets tan crudèls e dont la practica domètja persistís d’un biais clandestin e incontrarotlable. D’organizacions importantas coma l’Associacion de Proteccion dels Animals Sauvatges (ASPAS) menan de campanhas salutàrias còntra lu trabuchets mortals; que d’unes, enebits despuei d’annaas, encara s’utilizan larjament.

 

Consideram que dins aquel cas, es evident que la proteccion de l’environament e de la biodiversitat deu primar la tradicion. L’Assemblada Occitana sosten sens resèrva lo combat juridic de l’LPO. Condemna la tecnica de la chaça al visc e demanda son interdiccion definitiva. Es urgent qu’aquela tecnica siá abolia, tant lo declin de las populacions d’aucèls deven preocupant. La chaça al visc destorba la chaena alimentària e l’equilibri dels ecosistèmas. L’Assemblada Occitana demanda tanben un contraròtle sevèr e repressiu còntra l’usatge domètge clandestin dels trabuchets mortals e non selectius.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org