Carri lo Roet, Ais de Provença: sangfreg e prudéncia amb lo coronavirus

Comunicat · 05.02.2020

L’Assemblada Occitana compren lo besonh d’aculhir de refugiats de la region chinesa de Wuhan, que devon fugir lo perilh dau coronavirus. Per còntra, l’Assemblada Occitana denóncia la maniera opaca e autoritària de l’estat francés per installar aquelei refugiats a Carri lo Roet e Ais de Provença, sens ges de concertacion amb lei provençaus.

 

Lo cònsol de Carri lo Roet a ren pogut faire. Òr, Carri lo Roet e leis autrei comunas de la Còsta Blava an de besonh de dispausar de totei leis estructuras d’aculhença per lo festenau deis Orsinadas, dau 2 a 23 de febrier, qu’es fòrça important per tota l’encontrada.

 

La consolessa d’Ais de Provença protèsta gaire mai sembla clar que la vila d’Ais es estada forçada, ela tanben.

 

Sostenèm lei protèstas de certaneis abitants que vivon près dei centres d’aculhença, a Carri e a Ais. Lo principi d’ajudar de refugiats sanitaris es pas en causa. Çò qu’es en causa, es la tradicion d’opacitat e d’autoritarisme de l’estat francés qu’a ja escondut o tolerat fòrça escàndols sanitaris dins lo passat (nívols radioactivas de Chornobyl, distilbèn, ormòna de creissença, clordecòn, sang contaminat, amiant, isomerid, mediator, depaquina...). Leis abitants de Carri lo Roet e d’Ais de Provença an drech a una informacion completa e a una proteccion totala. Lei discors paternalistas de certanei representants de l’estat, que dison que “i a ges de risc”, sens donar d’explica clara, son inadmissibles.

 

Es clar que nosautres, leis occitans, volèm ajudar lei refugiats de Wuhan. En disent aquò, pasmens, se demandam se l’estat francés auriá installat lei refugiats sanitaris en Region Parisenca amb la meteissa opacitat qu’en Provença.

 

Sus aquela question, ne profecham, tanben, per demandar a tot lo mond de sangfreg e de discerniment. Es important de tombar pas dins lei teorias dau complòt. E es inacceptable que certanei personas fagan de racisme antichinés o antiasiatic. Es evident que lei populacions d’origina asiatica que vivon dins nòstre país son pas responsablas dau coronavirus.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org