Baiona e Auloron: entau respècte deus cresents, contra la violéncia fanatica

Comunicat · 6.11.2019

(Fòtos: Le Figaro e Wikipèdia)
(Fòtos: Le Figaro e Wikipèdia)

L’Assemblada Occitana que condemna las recentas violéncias contra la mosqueta de Baiona, en Gasconha, e contra la catedrala d’Auloron, en Bearn.

 

Dens los dus cas, que son agressions contra comunautats religiosas e contra la libertat de practicar tranquillament ua religion.

 

A la mosqueta de Baiona, un fanatic d’extrèma dreita qu’ataquèc dus fidèus musulmans, aus quaus desiram un restabliment rapid. A la catedrala d’Auloron, que son delinquents qui panèn objèctes preciós e qui destrugón ua pòrta medievala de grana valor artistica.

 

L’Assemblada Occitana que defend la laïcitat. Aquò qu’implica lo dreit de créser o de non créser pas en ua religion, e qu’implica tanben la defensa d’aqueths dreits.

 

En acòrdi dab la laïcitat, que combatèm los fanatics de tota traca —los fanatics politics e los fanatics religiós— quan pretenden impausar la lor vision exclusiva aus autes.

 

En acòrdi dab la laïcitat, atanben que defendèm los cresents e los lors lòcs de culte quan son atacats, e en parallèl que defendèm los dreits deus non-cresents.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org