Arte censura la cultura occitana d’Auvèrnhe

Comunicat · 03.10.2019

Lo divendres 24 de setembre, la chadena de television francoalemanda, Arte, difusèt un documentari sus Auvèrnhe, produit en 2012: dintre l’occitan i es mençonat dins lo resumit de la version alemanda mas censurat dins la version francesa.

 

La version alemanda indica que “Lo tèrme «puei», que s’empleja despuei plan longtemps per aquel païsatge de montanha, vòl dire en occitan «puei»” (“Der Begriff «puy», der schon seit Urzeiten für diese Berglandschaft verwendet wird, bedeutet auf Okzitanisch «Gipfel».”). Dins la version francesa del tèxt de presentacion, tota aquela frasa es pas escrita.

 

La consequéncia es que la cultura occitana d’Auvèrnhe apareis pas dins las guidas de programas ni dins los cerchadors dau mond francofòn.

 

L’Assemblada Occitana denóncia l’eliminacion de la referéncia a la lenga occitana dins la version francesa de la presentacion d’aquel documentari. E s’estona qu’una chadena francoalemanda, que normalament deuriá mostrar de dobertura sens sègre la doctrina lingüicida de l’estat francés, se plege a aquela censura evidenta de la realitat occitana. La realitat occitana, l’ocultan tròp regularament dins lo païsatge mediatic francés.

 

D’un biais general, tanben nos podèm pausar de questions sus lo desinterès tochant l’occitan dels mèdias finançats per l’argent public. La lenga e la cultura occitanas son reconegudas per lor influéncia màger dins la civilizacion europèa occidentala. E l’occitan es encara parlat per un a tres millions de personas. Èra classat 46e en 2012 per lo pes de las lengas dins lo Mond, sus un total de 5000 a 6000 lengas parladas (Ministèri de la Cultura, Baromètre de las lengas del Mond).

 

Encoratjam lo maximum de mond a escriure a la chadena per demandar una explicacion, per mejan del formulari de contacte de son sit web.

 

***

 

En 2019, l’Assemblada Nacionala Occitana deven l’Assemblada Occitana.

 

***

 

ASSEMBLADA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org