Consultacion ciutadana: una avançada per la region LRMP, un espèr per l'Occitània sancièra!

Comunicat · 23.06.2016

 

 

En seguida de la publicacion de l’enquèsta publica, lançada per la region administrativa francesa de Tolosa-Montpelhièr, sus la causida del nom de la novèla entitat fusionada, l’ANÒC se felicita de l’iniciativa democratica. La democracia en Occitània serà jamai pus granda que quand se demanda lo vejaire del pòble ciutadan.

 

Per remembrança, del 9 de mai al 10 de junh de 2016, los ciutadans de las doas regions mençonadas an agut l’escasença de s’exprimir per Internet o per copons de premsa sus lo nom de la region amb 5 opcions possiblas, entre elas “Occitània” e “Occitània-País Catalan”.

 

Malgrat que preconizèsse un nom dins lo qual figurèsse almens lo mot “Occitània”, obligatòriament acompanhat d’un qualificatiu per pas reduire Occitània tota a aquela soleta region fusionada, l’ANÒC se regaudís pasmens que mai de 116 000 ciutadans (siá mai del 57% dels participants de la consulta) ajan votat per qu’“Occitània” figure dins lo novèl nom de la region de Tolosa-Montpelhièr (dont lo 44,90% per “Occitània” e lo 12,15% per “Occitània-País Catalan”), e aquò malgrat totas las dificultats per aumentar mai lo nombre de participants.

 

L’ANÒC estima aquel vòte fòrça positiu perque mòstra que lo nom “Occitània” es ben present dins las consciéncias collectivas, çò que pròva l’existéncia d’una reala consciéncia d'èsser occitans, e los representants dels partits installats ne faràn a l’avenir una usança politica que poirà donar un vam novèl a l’idèa d’una Occitània digna e democratica.

 

L'ANÒC militarà totjorn per qu'aquela dinamica positiva s'espandisca dins totas las autras regions occitanas : Aquitània-Lemosin, Auvèrnha-Daufinat, Provença-Aups-Comtat de Niça.

 

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Posicion de l'ANÒC sus lo nom de la region Auvernha-Ròse Aups

Comunicat · 20.06.2016

[Auvernhat]

L’Assemblada Nacionala Occitana (ANÒC) entend d’intervenir dins lo debat sus los noms de las novèlas regions per presentar son punt de vista.

 

Lo debat a l’entorn dau futur nom en realitat es una cortina de fum per eschivar lo vertadèir problèma: la reforma territoriala entamenada per l’estat francés chamja pas fòrça la situacion de las regions que demòran de “regions-quimèras” sens personalitat istorica e sortent de retalhadas arbitràrias e purament tecnocraticas. Las fusions se son realizadas de la mesma manèira sens consultar lo vejaire de la populacion e de las collectivitats localas. Aquò constituís una manca de democracia denonciada per lo Conselh d’Euròpa. Enfin, aquela reforma levarà pas los problèmas estricturals de las regions: manca d’autonomia, feblesa economica, problèma budgetari...

 

L’ANÒC, que milita per una entitat unica per Occitània, rassemblant totes los país d’òc, se pòt pas satisfar de las règlas d’aqueste jòc tecnocratic que contituís de verai una “excepcion francesa”.

 

En considerant totun que l’union de totas las províncias d’òc se farà per estapas e que la reforma territoriala n’es una primèira, l’Assemblada nacionala Occitana es conscienta que la fusion de las regions d’Auvèrnhe e de Ròse-Aups constituís un certan progrès dins la mesura que los departaments majoritàriament occitans de Droma e d’Ardecha, isolats a passat temps dins la region de Ròse-Aups de predominància arpitana, se restacharàn ansin a Auvèrnhe. En mai d’aquò, los dos tèrç dau territòri de la novèla region seràn de lenga e cultura occitana.

 

Per aquelas rasons, l’ANÒC demanda que lo nom de la novèla region faça mençon obligatòriament de son occitanitat !

 

[Vivaro-aupenc]

 

L’Assemblaa Nacionala Occitana (ANÒC) entend d’intervenir dins lo debat sus los noms de las novèlas regions per presentar son ponch de vista.

 

Lo debat a l’entorn dau futur nom en realitat es una cortina de fum per eschivar lo vertadier problèma: la reforma territoriala entamenaa per l’estat francés chamja pas fòrça la situacion de las regions que demòran de “regions-quimèras” sens personalitat istorica e sortent de retalhaas arbitràrias e purament tecnocraticas. Las fusions se son realizaas de la mesma maniera sens consultar lo vejaire de la populacion e de las collectivitats localas. Aquò constituís una manca de democracia denonciaa per lo Conselh d’Euròpa. Enfin, aquela reforma levarà pas los problèmas estricturals de las regions: manca d’autonomia, feblesa economica, problèma budgetari...

 

L’ANÒC, que milita per una entitat unica per Occitània, rassemblant totes los país d’òc, se pòt pas satisfar de las règlas d’aqueste jòc tecnocratic que contituís de verai una “excepcion francesa”.

 

En considerant totun que l’union de totas las províncias d’òc se farà per estapas e que la reforma territoriala n’es una primiera, l’Assemblada nacionala Occitana es conscienta que la fusion de las regions d’Auvèrnhe e de Ròse-Aups constituís un certan progrès dins la mesura que los departaments majoritàriament occitans de Droma e d’Ardecha, isolats a passat temps dins la region de Ròse-Aups de predominància arpitana, se restacharàn ansin a Auvèrnhe. En mai d’aquò, los dos tèrç dau territòri de la novèla region seràn de lenga e cultura occitana.

 

Per aquelas rasons, l’ANÒC demanda que lo nom de la novèla region faça mençon obligatòriament de son occitanitat!

 

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


La fusion de las regions e la question de l'endeutament

Comunicat · 14.06.2016

Dins son darrièr comunicat, l’Assemblada Nacionala Occitana considerava que lo debat a l’entorn del futur nom de las nòvas regions èra una tela de fum espandida per escondre los problèmas costumièrs de la gestion de las collectivitats localas pel mercat-Estat-nacion francés: decisions administrativas arbitràrias, mancança de democracia, fauta de fisança en las populacions ciutadanas, abséncia d’autoritat politica amb una granda autonomia, flaquesa economica o d’una pensada economica per las novèlas regions, mai d’un problèma budgetari...

 

La question de l’endeutament de las regions es un exemple tipic d’aquelas manòbras tecnocraticas e financièras que l’ANÒC denonciava: un document de l’Agéncia Descomptes Publics mòstra que gràcias a la fusion, los deutes de certanas regions (qu’èran grèus) baissaràn, e que los d’autras (qu’èran leugièrs) aumentaràn.

 

D’un biais general, se lo deute d’una region es plan important, es en causa d’una marrida gestion de l’argent public pels conselhs regionals e pels elegits dels partits jacobins —de totas las colors— al poder de la decentralizacion en Occitània ; un feble deute pròva qu’una gestion melhora èra possibla. Aital amb la fusion, dins una perfiècha logica jacobina, las populacions de las regions financièrament establas pagaràn las incompeténcias politicas e administrativas dels conselhs regionals vesins.

 

Es lo cas per Miègjorn-Pirenèus qu’eireta de la gestion financièra catastrofica de la region de Lengadòc-Rosselhon. Parièr per Aquitània qu’eireta d’aquelas de Lemosin e Peitau-Charantas. Serà per Tolosa coma per Bordèu lo prètz del recentratge dels poders de las nòvas regions dins aquelas vilas.

 

Lo sol ganhant d’aquel calcul escur serà lo govèrn de l’Estat francés que règla aital un problèma espinós vist que las còlas responsablas de la marrida gestion de las regions de Lengadòc-Rosselhon, Lemosin e Peitau-Charantas son del meteis partit politic que la majoritat actuala al poder parisenc. Seriá estat parièr amb quin que siá partit jacobin.

 

A aqueste títol, dins son rapòrt sus l’estat de la democracia locala en França, lo Conselh d’Euròpa a criticat l’Estat francés sus la fusion de las regions en denonciant la mancança de consulta prèvia dels representants de las collectivitats territorialas, la tròp febla sollicitacion dels representants d’associacions de poders locals e tanben lo mesclum de las competéncias entre las regions qu’an fusionat.

 

L’ANÒC assumís una pensada politica liura e doncas preconiza de vertadièras entitats regionalas, amb d’identitats culturalas, lingüisticas e istoricas, una gestion autonòma e un mitan politic local alonhat dels calculs dels partits jacobins.

 

Volèm de regions que sèrvan d’interlocutors locals al poder central e non de far-valer dels politicians parisencs.

 

Aital volèm una fiscalitat pròpria e lo desengatjament fiscal de l’Estat centralista que pròva que sap pas gerir l’argent public de la descentralizacion.

 

Sèm per una constitucion democratica dins totas las regions occitanas, amb l’assentiment de tota la populacion d’Occitània: una manièra de demandar una reala reforma novèla e seriosa sus lo descopatge regional e la lei “NOTRe” (Novèla Organizacion Territoriala de la Republica).

 

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Posicion de l'ANÒC sus lo futur nom de la region Aquitània-Lemosin-Peitau Charantas

Comunicat · 14.04.2016

L’Assemblada Nacionala Occitana entend intervenir dins lo debat sus los noms de las nòvas regions per presentar lo sieu ponch de vista.

 

Lo debat a l’entorn dels futurs noms de las regions es en realitat una tela de fum per far esquivar lo vertadièr problèma: la reforma territoriala entamenada per l’Estat francés càmbia pas gaire la situacion de las regions que demòran de “regions-quimèras” sens personalitat istorica e eissidas de retalhadas arbitràrias purament tecnocraticas. Las fusions son estadas realizadas del meteis biais sens consultar l’avís de la populacion e de las collectivitats localas. Aquò constituís una mancança de democracia qu’es denonciada per lo Conselh d’Euròpa. Enfin, aquela reforma levarà pas los problèmas estructurals de las regions: mancança d’autonomia, feblesa economica, problèma budgetari...

 

 

L’ANÒC, que milita per una entitat unica per Occitània que recampe totes los païses d’òc, non se pòt satisfaire de las règlas d’aquel jòc tecnocratic qu’es vertadièrament una “excepcion francesa”.

 

Considerant totun que l’union de totas las províncias d’òc se farà per estapas e que la reforma territoriala n’es una primièra, l’Assemblada Nacionala Occitana es conscienta que la fusion de las regions Aquitània-Lemosin-Peitau Charantas constituís un certan progrès: la màger part dels territòris lemosins es enfin reünida (levat la part orientala de la Marcha) e demòra ligada a una entitat majoritàriament occitana (levat la part santongesa e peitavina qu’es de lenga d’oïl). Se regrèta ça que la l’escasença mancada d’unificacion dels territòris gascons, encara devesits per la frontièra arbitrària entre las ancianas regions Aquitània e Miègjorn-Pirenèus.

 

En consequéncia, l’ANÒC preconiza per la nòva region un nom que faga obligatòriament mençon de la siá occitanitat.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Posicion de l'ANÒC sus lo futur nom de la region Lengadòc-Rosselhon-Miègjorn-Pirenèus

Comunicat · 13.04.2016

 

L’Assemblada Nacionala Occitana entend intervenir dins lo debat sus los noms de las nòvas regions per presentar lo sieu ponch de vista.

 

Despuèi de meses s’espandís l’idèa d’apelar “Occitània” la nòva region eissida de la fusion entre Lengadòc-Rosselhon e Miègjorn-Pirenèus. D’un costat, seriá l’unica escasença per Occitània d’aver enfin una entitat territoriala que portèsse lo sieu nom. Mas de l’autre, apelar “Occitània” un territòri limitat essencialament a Lengadòc, una part de Guiana e un tròç de Gasconha, revendriá a exclure d’Occitània totes los autres païses d’òc (Provença, Niça, Païses Alpencs, Auvèrnha, Lemosin e Gasconha aquitana), çò que constituiriá una regression.

 

En defòra d’aquò, lo debat a l’entorn del futur nom es en realitat una tela de fum per far esquivar lo vertadièr problèma: la reforma territoriala entamenada per l’estat francés càmbia gaire la situacion de las regions que demòran de “regions-quimèras” sens personalitat istorica e eissidas de retalhadas arbitràrias purament tecnocraticas. Las fusions son estadas realizadas del meteis biais sens consultar l’avís de la populacion e de las collectivitats localas. Aquò constituís una mancança de democracia denonciada per lo Conselh d’Euròpa. Enfin, aquela reforma levarà pas los problèmas estructurals de las regions: mancança d’autonomia, feblesa economica, problèma budgetari...

 

L’ANÒC, que milita per una entitat unica per Occitània que recampe totes los païses d’òc, non se pòt satisfaire de las règlas d’aquel jòc tecnocratic qu’es vertadièrament una “excepcion francesa”.

 

Considerant totun que l’union de totas las províncias d’òc se farà per estapas e que la reforma territoriala n’es una primièra, e conscienta doncas de l’enjòc que representa la nominacion futura de las nòvas regions, l’Assemblada Nacionala Occitana preconiza per la nòva region eissida de la fusion de Miègjorn-Pirenèus e Lengadòc-Rosselhon un nom que faga almens mençon de la siá occitanitat.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Es nascuda l’Assemblada Nacionala Occitana

Comunicat · 17.03.2016

 

Despuèi lo 20 de febrièr de 2016 es nascuda l’Assemblada Nacionala Occitana (ANÒC).

 

L’ANÒC es una associacion plurala, democratica e populara creada per mobilizar totas las fòrças vivas de la societat civila occitana dins l’objectiu d’obtenir la reconoissença de l’existéncia de la nacion occitana, l’aveniment d’una economia occitana sobeirana, dinamica, ecologica e sociala, la constitucion d’una vertadièra entitat territoriala occitana, la promocion e lo desvolopament de la cultura e de la lenga occitanas amb un estatut de lenga oficiala e la generalizacion de son ensenhament a totes los nivèls, sens desmembrar totas las aisinas necessàrias per restaurar la dignitat nacionala occitana (autonomia, autodeterminacion).

 

Lo projècte ancian de crear aquesta assemblada s’es mes en camin lo 24 de julhet de 2015 a l’escasença d’un primièr rescontre que reüniguèt de patriòtas occitans de tendéncias politicas divèrsas (Partit de la Nacion Occitana, Iniciativa per Occitània, Partit Occitan, Libertat, independents) e permetèt de fixar los ponches de convergéncia que seràn marcats dins l’objècte de l’associacion. Lo 25 d’octòbre, un segond acamp se tenguèt a Montpelhièr per la redaccion dels estatuts. Enfin, lo 30 de novembre de 2015 se debanèt a Marselha l’amassada generala constitutiva que permetèt la finalizacion del projècte. Après publicacion dels estatuts lo 10 de febrièr de 2016 e publicacion al Jornal Oficial de las Associacions, l’associacion es nascuda !

 

Son nom es Assemblada Nacionala Occitana, son eslogan es “Units per Occitània”.

 

Una novèla èra se duèrb dins la revendicacion nacionala occitana !

 

L’ANÒC a per ambicion de revelhar la consciéncia nacionala occitana, anestesiada despuèi tròp de temps. Sa tòca se vòl maximalista.

 

Volèm existir !

 

Volèm una entitat territoriala occitana !

 

Volèm decidir de l’avenir del nòstre País d’Òc !

 

Volèm parlar la lenga occitana dins totes los sectors de la vida sociala, la volèm desvolopar dins las familhas e ajudar sa transmission de generacion en generacion !

 

Convidam totes los estatjants d’Occitània o d’autres luòcs, estacats a la nòstra lenga, la nòstra cultura, de rejónher l’Assemblada Nacionala Occitana per partejar una nòva vision de l’avenir del país nòstre.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93