ARCHIUS (ACTUALITATS 2017)


Niça. Debat ciutadan sus la situacion en Catalonha

06.12.2017

Lo 15 de decembre dau 2017 a 19o30 si debanerà a Niça (3 Carriera Valperga) un debat ciutadan sus la situacion de Catalonha.

 

L'Assemblada Nacionala Occitana participerà an aquesto debat organizat a l'iniciativa dei organizacions:

  • Associacion ciutadana dei catalans e francés
  • Assemblada Nacionala Catalana (ANC França)
  • ENSEMBLE!06
  • Assemblada Nacional Occitana (ANÒC)
  • Republica Federala Occitana
  • República de Nissa
  • NPA06

Lo debat es public e animat per de ciutadan/as catalan/i e occitan/i de Niça pertocat/di ò interessat/di per la question catalana.

 

Li a possibilitat de restauracion sus plaça per un sopar de convivéncia.


Visca la Republica de Catalonha e Aran!

27.10.2017

Fòto: Mònica Pérez (El Nacional)


Ajudatz Catalonha! Salvatz Euròpa!

17.10.2017


Libertat Jordis! Presoniers politics de l'estat espanhòu

16.10.2017

Lei presidents deis associacions independentistas catalanas ANC e Òmnium son en preson. Es una vergonha! Per remembrança, l'ANÒC s'es fondada sus lo modèl de l'ANC.

#LlibertatJordis, lei presoniers politics de l'estat espanhòu!


Marselha: mobilizem-nos fàcia au terrorisme!

1.10.2017

Un còp de mai, lei terroristas jihadistas atacan nòstra population. Ploram uei la mòrt de doas femnas a Marselha. Non a la terror! Mobilizem-nos!

 

Trobaretz mai d'informacions dins aqueste article de la Provence


Òc a la libertat de Catalonha e Aran! Non a la repression!

1.10.2017

Òc a la libertat de Catalonha e Aran! Sí a la llibertat de Catalunya i Aran! Non a la repression de l'estat espanhòl!


Lo Collectiu dels Pòbles en Lucha rejonch pels patriòtas d’Escòcia, de Guaiana e de Sardenha!

16.05.2017

Collectiu dels Pòbles en Lucha

(los representants dels pòbles en lucha)

 

Occitània: Martina GROS

Cabilia: Lamara AT CEBBI

Corsega: Patrick SCHMITT-BAZZALI

Escòcia: Mairead TAGG

Guaiana: Ti'iwan COUCHILI

Illa de la Reünion: Bernard GRONDIN

Sardenha: Sergio PES

Sicília: Rosa CASSATA


L'ANÒC apèla a participar al sondatge del jornal Le Point sus las lengas regionalas

16.05.2017

L'ANÒC convida totas la personas estacadas a las lengas regionalas de participar al sondatge del jornal Le Point sus la question de l'intensificacion de lor ensenhament!


Eleccion presidenciala francesa 2017: l'ANÒC demanda de barrar la rota a l'extremisme!

19.04.2017

Eleccion presidenciala francesa 2017 - L'ANÒC, que denóncia lei candidats malonèsts e corromputs e/o que desvolopan d’idèas antidemocraticas e d’extrèma drecha coma l’asirança e l’autoritarisme, demanda de barrar la rota a François Fillon, Marine Le Pen, François Asselineau e Nicolas Dupont-Aignan.


Campanha d'adesions a l'ANÒC: ara se pòt pagar per Internet!

30.01.2017

Après lo chèc e lo virament bancari, podètz pagar vòstre escotisson a l'ANÒC gràcia al mejan de pòt solidari que fonciona amb la carta bancària! 

 

Per remembrança, l'Assemblada Nacionala Occitana lança una campanha d’adesions per recrutar de sòcis de plen drech, mas tanben per desvolopar de nòvas formas d'adesions: los collaboradors e los simpatizants.

 

Ara podètz pagar per chèc, per virament bancari e per carta bancària sul sit Le Pot Commun!

 

Per que siam Units per Occitània, aderissetz a l'ANÒC!


L’Assemblada Nacionala Occitana lança sa campanha d’adesions!

19.01.2017

 

 

 

 

Marcatz-vos per devenir sòcis de l’Assemblada Nacionala Occitana!

 

 

 

 

 

 

L'Assemblada Nacionala Occitana (ANÒC) es una associacion de lei 1901. A per objectiu de recampar totas las fòrças vivas de la societat occitana, que sián aquelas de tota mena de collectius, entitats, grops, laboratòris d’idèas, movements, organizacions, partits politics, autras estructuras, o que sián individualas, per complir las finalitats que son:

  • La reconeissença de la nacion occitana, dins sa pluralitat lingüistica e culturala, e la presa de consciéncia del pòble occitan de i aperténer
  • L’aveniment d’una economia occitana sobeirana, dinamica, ecologica e sociala
  • La creacion de las condicions politicas e socialas necessàrias per l’establiment e la constitucion d’una vertadièra entitat territoriala occitana pròpria, que siá plurala, federativa e democratica
  • La promocion e lo desvolopament de la cultura e de la lenga occitanas, amb un estatut de lenga oficiala e la generalizacion de son ensenhament a totes los nivèls
  • Sens oblidar totas las aisinas necessàrias per restaurar la dignitat nacionala occitana (autonomia, autodeterminacion, independéncia).

 

L’Assemblada Nacionala Occitana es pas un parlament simbolic! - Es una associacion que regula sas activitats en acòrdi amb sos estatuts e amb aqueles que regís la lei del 01/07/1901 e lo decret del 16/08/1901.

 

L’Assemblada Nacionala Occitana es pas un partit politic! - Demòra totalament independenta de quin que siá partit politic e a pas vocacion de se presentar a las eleccions.

 

L’Assemblada Nacionala Occitana es pas un collectiu culturalista! - Son objècte es clarament politic. 

 

Per complir sas finalitats, l’ANÒC prepausa divèrsas accions:  

 

  • Organizacion de conferéncias, congrèsses e jornadas d’analisi, debat, estudi, planificacion d’accions e presas de decisions votadas, dins diferentas vilas d’Occitània causidas per rotacion.
  • Organizacion de tota mena d’actes e activitats destinats a la formacion dels sieus sòcis, collaboradors e simpatizants.
  • Organizacion de tota mena d’actes divulgatius e de dinamizacion sociala relatius a las finalitats de l’Associacion : accions de visibilitat dins l’espaci public e mediatic ; informacions e rapòrts independents sus la realitat nacionala e la desinformacion dels estats tocant Occitània ; accions de lucha en favor de la justícia sociala, d’una economia solidària, d’un sistèma judiciari equitable e de la defensa de l’environament en Occitània ; promocion, valorizacion e popularizacion de la lenga occitana ; formacion d’un grop de pression en ligason amb los ponches citats çai sus.
  • Edicion de publicacions sobre las òbras e las conclusions que derivan de las siás activitats.
  • Elaboracion de proposicions e argumentaris relatius a las finalitats de l’Associacion.
  • Creacion de materials divulgatius de mai d’un tipe e sus quin que siá supòrt.
  • Archivatge dels materials e de las activitats de l’Associacion en ligason amb lo Centre Interregional de Desvolopament de l’Occitan (CIRDÒC).
  • Cooperacions amb de projèctes occitanistas o observacions d’aquestes.
  • Contactes amb d’organizacions internacionalas e organizacion d’una diaspòra occitana.

 

L’ANÒC lança una campanha d’adesion per recrutar de sòcis. Son sòcis de plen drech de l’ANÒC totas las personas fisicas majoras d’edat, independentament de la lor origina o nacionalitat e de la lor posicion politica, ideologica, culturala o sociala, que s’engatjan a trabalhar per permetre la realizacion dels objectius inicials de l’Associacion. 

 

Los sòcis de plen drech pòdon assistir e votar a las reünions de l’Amassada Generala, elegir e èsser elegits a de pòstes de representants o de direccion, intervenir dins la presa de decisions, l’organizacion, las gestions, los servicis e las activitats de l’Associacion, expausar totas las proposicions, preconizacions e reclamacions que pòscan contribuir al melhor foncionament de l’Associacion, recebre d’informacions sus las activitats de l’Associacion, far partida dels grops de trabalh o d’autres organs complementaris que se pòdon crear…

 

Mas l’ANÒC vòl tanben desvolopar de nòvas formas d’adesion: los collaboradors e los simpatizants.

 

Las personas collaboradoras son aquelas que, malgrat que sián pas de sòcis de plen drech de l’Associacion, se senton engatjadas amb sas finalitats e, d’un biais liure e volontari, vòlon trabalhar activament dins las accions e activitats que l’Associacion preconiza. An pas drech de vòte a las assembladas generalas ni a las eleccions al Secretariat Nacional, mas pòdon collaborar a las òbras de l’Associacion.

 

Las personas simpatizantas son aquelas que tròban un interès dins las finalitats de l’Associacion e que vòlon recebre d’informacions de sas activitats, en tot causir de se registrar pas coma de sòcis de plen drech o coma de collaboradors de l’Associacion. Pòdon assistir a d’acamps de las assembladas territorialas e sectorialas de l’Associacion se i son convidadas, pasmens i auràn pas drech de vòte.


L'ANÒC èra presenta au debat de l'avenidor de l'occitanisme en Provença, a l'Ostau dau País Marselhés

09.01.2017

Dissabte passat, lo 7 de genier, se debanèt a Marselha, dins lei locaus de l'Ostau dau País Marselhés (OPM), una amassada per discutir deis escomesas que tòcan l'occitanisme dins la region Provença-Aups-Còsta d'Azur. 

 

L'amassada aculhiguèt mai de 35 personas, majoritàriament de Provença, engatjadas dins la promocion de l'occitan e representant divèrseis estructuras e associacions coma l’Institut d’Estudis Occitans (IEO), Niça Pantais (Nissa Pantai)-Centre Cultural Occitan País Niçard e Alpenc (CCÒC), lo Partit Occitan (PÒC), Iniciativa per Occitània (IPO), lo Partit de la Nacion Occitana (PNO) e lo quite OPM. L'ANÒC i participèt e èra representada per tres sòcis de son secretariat nacionau: Cristòu Daurore, Ciril Joanin e Domergue Sumien.

 

Fòrça subjèctes i foguèron tractats coma la baissa dei subvencions regionalas ai Calandretas de Provença e lei consequéncias de la confiscacion dau nom "Occitanie" per la region de Tolosa-Montpelhièr; e se parlèt  de l'avenidor de l'occitanisme en Provença, en País Niçard e dins leis Aups.

 

L'escambi èra fòrça constructiu e positiu e permetèt de fixar manteis idèas e proposicions per respòndre ai problèmas e escomesas que deu afrontar lo movement occitanista en Provença. Aquelei proposicions van dins lo sens de l'unitat e la solidaritat entre organizacions occitanistas.


Quina que siá nòstra region, totes bastissèm Occitània!

02.01.2017