Al començament de 2013, entre militants occitanistas nais l'idèa de fargar un movement ciutadan occitan bastit sul modèl de l'ANC catalana.
Lo 8 de junh de 2013, un rescontre es organizat a Lausana amb los representants de la diaspòra catalana en Soïssa per escambiar sus l'experiéncia dels catalans dins la
formacion e la gestion de l'ANC.
Prima de 2015, après una annada d'observacion sul foncionament de l'ANC catalana dins l'encastre de la consulta per l'independéncia de Catalonha en setembre de 2014, lo
projècte de movement ciutadan occitan pren forma jol nom d'Assemblada Nacionala Occitana (ANÒC) e es prepausat a de nombroses militants occitanistas de tendéncias divèrsas mejançant un
escambi agropat sus Facebook.
Lo 24 de julhet de 2015, lo projècte se croncretiza a Rodés amb una primièra reünion mediatizada de militants occitanistas, e ne sortís un ponch de consens entre
totes los actors presents. Aquel ponch es la basa de l’objècte de la futura associacion.
Lo 25 d'octòbre de 2015, una segonda reünion es organizada a Montpelhièr l'endeman de la manifestacion d'Anem Òc "per la lenga occitana". Dins aquela reünion, los
estatuts de l'associacion son redigits.
Lo 30 de novembre de 2015, una darrièra reünion —l'assemblada generala constitutiva— es organizada a Marselha e fixa los darrièrs detalhs tecnics e lo plan
d'accions de menar per la fondacion de l'associacion.
Al començament de 2016, las cambadas administrativas se fan per la fondacion de l'ANÒC.
L'11 de febrièr de 2016, los estatuts de l'associacion se depausan a la prefectura de las Bocas de Ròse.
Lo 20 de febrièr de 2016, la creacion de l'Associacion es validada per la prefectura e se publica al Jornal Oficial de las Associacions. L'ANÒC es nascuda!
Lo 16 de julhet de 2016, es organizada en Arle la primièra reünion generala de l'ANÒC dempuèi sa creacion. Son votadas las decisions tocant los instruments de foncionament
(escotissons, compte bancari) e de comunicacion (sit Internet). Tanben se vòta lo cambiament de sèti social, que passa de Marselha a Ais de Provença. Enfin, se definís un plan d'accions per
las annadas futuras.
ASSEMBLADA NACIONALA OCCITANA (ANÒC)
L'Assemblada Nacionala Occitana es una associacion qu'a per tòca d'amassar totas
las fòrças vivas de la societat occitana per restaurar la dignitat nacionala
occitana.
