ESTATUTS DE L’ASSOCIACION «ASSEMBLADA NACIONALA OCCITANA»


Aprovats per l'AG del 30.11.2015 a Marselha

Modificats per l'AG del 16.07.2016 en Arle


Indèx

 

 

Capítol I. La denominacion, las finalitats e lo sèti

 

Capítol II. Los sòcis de l’Assemblada Nacionala Occitana: dreches e obligacions

 

Capítol III. Las personas collaboradoras e los simpatizants

 

Capítol IV. Organs de l’Assemblada Nacionala Occitana

 

Capítol V. L’Amassada Generala

 

Capítol VI. Lo Secretariat Nacional

 

Capítol VII. La presidéncia

 

Capítol VIII. Lo secretari e lo clavaire

 

Capítol IX. Las assembladas territorialas

 

Capítol X. Las assembladas sectorialas

 

Capítol XI. Lo regim economic

 

Capítol XII. Lo regim disciplinari

 

Capítol XIII. La dissolucion de l’Associacion

 

Capítol XIV. Arbitratge

 

Capítol XV. Conselh Territorial e Sectorial

 

Capítol XVI. Lo Conselh Federal de las Assembladas Nacionalas Occitanas

 

Disposicions transitòrias


Capítol I. La denominacion, las finalitats e lo sèti

 

Article 1.

 

1.1 Amb la denominacion Assemblada Nacionala Occitana es constituida, per un temps indefinit, una associacion que regularà sas activitats en acòrdi amb aquestes estatuts e amb aqueles que regís la lei del 1èr de julhet de 1901 e lo decret del 16 d’agost de 1901.

 

D’ara enlà, aquesta associacion serà referenciada indistintament coma l’“Assemblada Nacionala Occitana” o l’“Associacion”.

 

1.2 Las disposicions d’aquestes estatuts seràn desvolopadas o completadas amb un Reglament de Regim Intèrne de l’Associacion.

 

Article 2.

 

2.1 L’Assemblada Nacionala Occitana a per objectiu de recampar totas las fòrças vivas de la societat occitana, que sián aquelas de tota mena de collectius, entitats, grops, laboratòris d’idèas, movements, organizacions, partits politics, autras estructuras, o que sián individualas, per complir las finalitats que son:

 

a) La reconeissença de la nacion occitana, dins sa pluralitat lingüistica e culturala, e la presa de consciéncia del pòble occitan de i aperténer.

 

b) L’aveniment d’una economia occitana sobeirana, dinamica, ecologica e sociala.

 

c) La creacion de las condicions politicas e socialas necessàrias per l’establiment e la constitucion d’una vertadièra entitat territoriala occitana pròpria, que siá plurala, federativa e democratica.

 

d) La promocion e lo desvolopament de la cultura e de la lenga occitanas, amb un estatut de lenga oficiala e la generalizacion de son ensenhament a totes los nivèls.

 

e) Sens oblidar totas las aisinas necessàrias per restaurar la dignitat nacionala occitana (autonomia, autodeterminacion, independéncia).

 

2.2 Per complir las sieunas finalitats, a títol purament enonciatiu e non exaustiu, l’Associacion realizarà las activitats seguentas:

 

a) Conferéncias, congrèsses e jornadas d’analisi, debat, estudi, planificacion d’accions e presas de decisions votadas, dins diferentas vilas d’Occitània causidas per rotacion.

 

b) Organizacion de tota mena d’actes e activitats destinats a la formacion dels sieus sòcis, collaboradors e simpatizants.

 

c) Organizacion de tota mena d’actes divulgatius e de dinamizacion sociala relatius a las finalitats de l’Associacion:

 

 Accions de visibilitat dins l’espaci public e mediatic.

 Informacions e rapòrts independents sus la realitat nacionala e la desinformacion dels estats tocant Occitània.

— Accions de lucha en favor de la justícia sociala, d’una economia solidària, d’un sistèma judiciari equitable e de la defensa de l’environament en Occitània.

— Promocion, valorizacion e popularizacion de la lenga occitana.

— Formacion d’un grop de pression en ligason amb los ponches citats çai sus.

 

d) Edicion de publicacions subre las òbras e las conclusions que derivan de las siás activitats.

 

e) Elaboracion de proposicions e argumentaris relatius a las finalitats de l’Associacion.

 

f) Creacion de materials divulgatius de mai d’un tipe e sus quin que siá supòrt.

 

g) Archivatge dels materials e de las activitats de l’Associacion en ligason amb lo Centre Interregional de Desvolopament de l’Occitan (CIRDÒC).

 

h) Cooperacions amb de projèctes occitanistas o observacions d’aquestes.

 

i) Contactes amb d’organizacions internacionalas e organizacion d’una diaspòra occitana.

 

2.3 La participacion a l’Assemblada Nacionala Occitana serà sempre a títol individual.

 

2.4 L’Assemblada Nacionala Occitana es pas un parlament simbolic.

 

2.5 L’Assemblada Nacionala Occitana demorarà totalament independenta de quin que siá partit politic e a pas vocacion de se presentar a las eleccions.

 

2.6 L’Assemblada Nacionala Occitana es pas un collectiu culturalista. Son objècte es clarament politic.

 

2.7 L’Assemblada Nacionala Occitana es pas una organizacion de tòca lucrativa.

 

Article 3.

 

3.1 L’Assemblada Nacionala Occitana a lo sieu sèti social al 18Bis Carrièra Santa Estèla, 13090 AIS-DE-PROVENÇA.

 

Pasmens las acamps dels sieus organs socials se poiràn debanar dins d’autres luòcs anonciats coma se deu. Per decision del Secretariat Nacional se poirà modificar lo sèti social de l’Associacion.

 

3.2 Lo camp d’accion de l’Associacion es Occitània tota, es a dire l’ensemble dels territòris de lenga pròpria d’òc, administrats per l’Estat francés, e mai las Valadas Occitanas e la Gàrdia per l’estat italian, lo Principat de Mónegue e la Val d’Aran administrada per l’autoritat del Principat de Catalonha. Pasmens, l’activitat de l’Associacion se poirà projectar delà aquel espaci.

 

3.3 La lenga preferenciala de trabalh es l’occitan. Las publicacions e comunicacions de l’Associacion se faràn en occitan e dins la lenga oficiala.

 

3.4 L’Associacion, en conformitat amb los presents estatuts, es basada sus l’ensemble de sas assembladas territorialas. E mai, se poirà crear d’assembladas exterioras, una per cada estat, sens prejudici ligat a la subdivision, se i a acòrdi dels sieus sòcis e, en cas de mancança d’acòrdi, segon lo Secretariat Nacional. D’ara enlà, totas las referéncias fachas a las assembladas territorialas deuràn èsser fachas tanben a las assembladas exterioras, per que pòscan èsser aplicablas o per que non s’exclugan exprèssament dins aquestes estatuts o dins lo Reglament de Regim Intèrne de l’Associacion.

 

3.5 L’Associacion poirà crear, ansin, las assembladas sectorialas que son consideradas coma mai adaptadas al melhor compliment de sas foncions e finalitats.


Capítol II. Los sòcis de l’Assemblada Nacionala Occitana: dreches e obligacions

 

Article 4.

 

4.1 Pòdon èsser sòcis de l’Assemblada Nacionala Occitana totas las personas fisicas majoras d’edat, independentament de la lor origina o nacionalitat e de la lor posicion politica, ideologica, culturala o sociala, que s’engatjan a trabalhar per permetre la realizacion dels objectius inicials.

 

4.2 Las personas que vòlon èsser de sòcis de l’Associacion pòdon far la demanda d’adesion al secretariat de l’assemblada territoriala o sectoriala a la quala se vòlon integrar, o al Secretariat Nacional. Los dos secretariats avaloraràn conjonchament se i a qualque empediment que permeta pas l’admission d’una persona e, un còp verificada la conformitat a las exigéncias estatutàrias, los candidats aqueriràn l’estatut de sòci. En cas de refús motivat de la demanda d’admission, lo/a canditat/a ne serà informat/da pel Secretariat Nacional dins lo mes que seguís la recepcion de la demanda.

 

Article 5.

 

Los dreches dels sòcis de l’Associacion son los seguents:

 

5.1 Assistir e votar a las reünions de l’Amassada Generala, a las de l’assemblada territoriala a la quala son marcats, e a las de son assemblada sectoriala se participan a certanas, a condicion que sián totjorn a jorn dins lo pagament de las contribucions financièras a las qualas son engatjats.

 

5.2 Elegir e èsser elegits a de pòstes de representants o de direccion que se determinan dins los presents estatuts o los que se pòdon establir dins lo futur, a condicion que sián totjorn a jorn dins lo pagament de las contribucions financièras a las qualas son engatjats e qu’ajan una ancianetat minimala de trenta (30) jorns coma sòcis de l’Associacion.

 

5.3 Exercir la representacion que se lor conferís en cada cas.

 

5.4 Intervenir dins la presa de decisions, l’organizacion, las gestions, los servicis e las activitats de l’Associacion, en acòrdi amb los mecanismes de participacion e amb l’estructura organica determinada dins los presents estatuts o dins lo Reglament de Regim Intèrne que los emplegan.

 

5.5 Expausar al Secretariat Nacional e al secretariat de son assemblada territoriala o sectoriala totas las proposicions, preconizacions e reclamacions que pòscan contribuir al melhor foncionament de l’Associacion e rendre mai eficaça la realizacion dels objectius inicials.

 

5.6 Demandar e obténer d’explicacions sus l’administracion e la gestion de lor assemblada territoriala o sectoriala e del Secretariat Nacional, o de las personas o organs que dins aquestes lor delègan d’unas de lors foncions. La demanda se farà per escrich e lo secretariat interpelat dispausarà de trenta (30) jorns per lor donar la responsa apropriada.

 

5.7 Recebre d’informacions sus las activitats de l’Associacion, talas coma los bulletins, las publicacions, los estudis e las documentacions que l’Associacion publica.

 

5.8 Far partida dels grops de trabalh o d’autres organs complementaris que se pòdon crear.

 

5.9 Èsser escotats abans l’adopcion de mesuras disciplinàrias.

 

5.10 Possedir un exemplar dels estatuts e del Reglament de Regim Intèrne.

 

Article 6.

 

Los devers dels sòcis de l’Associacion son:

 

6.1 S’engatjar a las finalitats de l’Associacion e participar, en cas, a las activitats que favorizan lors realizacions.

 

6.2 Respectar e se conformar a las resolucions adoptadas pels organs de govèrn de l’Associacion, a condicion que contradigan pas los estatuts ni lo Reglament de Regim Intèrne.

 

6.3 Respectar las obligacions restantas que resultan de las disposicions estatutàrias e del Reglament de Regim Intèrne.

 

6.4 Contribuir al sosten de l’Associacion pel pagament annual dels escotissons que son estats decidits, prepausats pel Secretariat Nacional e aprovats per l’Amassada Generala, tot coma lo budget de l’exercici.

 

6.5 Designar una adreiça, de preferéncia de corrièr electronic, per la basa de donadas de l’Associacion. Aquela adreiça serà valida per recebre e emetre tota mena de comunicacions amb l’Associacion, compresas las convocacions a l’Amassada Generala.

 

Article 7.

 

La pèrda de l’estatut de sòci de l’Associacion se farà per:

 

7.1 La decision volontària de la persona interessada, que deurà èsser comunicada per escrich al Secretariat Nacional.

 

7.2 Lo non-pagament d’una annada d’escotisson sens que i aja agut una declaracion d’exempcion de part del Secretariat Nacional. En aquel cas, lo sòci serà considerat coma collaborador, amb los dreches e las obligacions confòrmes a aquel estatut. Quand lo pagament de l’escotisson de retard serà realizat, la persona concernida recuperarà son estatut de sòci.

 

7.3 Lo refús certificat de las obligacions estatutàrias.

 

7.4 L’imposicion d’una sancion disciplinària, que requerirà un acòrdi motivat del Secretariat Nacional, en conformitat amb las disposicions de l’article 36 d’aquestes estatuts. Se lo sòci sancionat d’una pèrda d’estatut recor a l’Amassada Generala, mentre que la pèrda d’estatut per sancion disciplinària es pas confirmada per l’Amassada Generala, segon çò que prevei l’article 11 d’aquestes estatuts, lo Secretariat Nacional pòt decidir la suspension preventiva del sòci.


Capítol III. Las personas collaboradoras e los simpatizants

 

Article 8.

 

8.1 Las personas collaboradoras son aquelas que, malgrat que sián pas, per qualque rason que siá, de sòcis de plen drech de l’Associacion, o malgrat que reüniscan pas las condicions per n’èsser, se senton engatjadas amb sas finalitats e, d’un biais liure e volontari, vòlon trabalhar activament dins las accions e activitats que l’Associacion preconiza.

 

8.2 L’Associacion tendrà un registre de personas collaboradoras e un autre de personas simpatizantas.

 

8.3 Las personas collaboradoras, qu’auràn pas drech de vòte a las assembladas generalas ni a las eleccions al Secretariat Nacional, poiràn collaborar a las òbras de l’Associacion en conformitat amb las determinacions establidas pel Secretariat Nacional o son assemblada territoriala o sectoriala, segon las competéncias respectivas.

 

8.4 Las personas collaboradoras e los simpatizants poiràn portar de contribucions financièras volontàrias a l’Associacion. Aquelas contribucions seràn coma conven comptabilizadas pels responsables de clavaire del Secretariat Nacional, e de l’assemblada territoriala, tombant lo cas.

 

8.5 Las personas simpatizantas son aquelas que tròban un interès dins las finalitats de l’Associacion e que vòlon recebre d’informacions de sas activitats, en tot causir de se registrar pas coma de sòcis de plen drech o coma de collaboradors de l’Associacion, o de pas reünir las condicions per n’èsser.

 

8.6 Las personas simpatizantas poiràn assistir a d’acamps de las assembladas territorialas e sectorialas de l’Associacion se i son convidadas, pasmens i auràn pas drech de vòte.


Capítol IV. Organs de l’Assemblada Nacionala Occitana

 

Article 9.

 

Los organs de l’Assemblada Nacionala Occitana son:

 

9.1  L’Amassada Generala de l’Associacion, qu’es constituida per totes los sòcis e que n’es l’organ sobeiran collectiu.

 

9.2 Lo Secretariat Nacional, que fa ofici de conselh d’administracion de l’Associacion e que la representa entre doas assembladas generalas.

 

9.3 Las assembladas territorialas, que son d’organismes sobeirans dins cada domeni e son consideradas coma d’antenas regionalas de l’Associacion, e que son una de las doas unitats de basa de l’Associacion.

 

9.4 Las assembladas sectorialas, que son dedicadas a las activitats e a la promocion de las finalitats de l’Associacion, organizadas per domenis professionals, socials o culturals, e que son l’autra unitat de basa.


Capítol V. L’Amassada Generala

 

Article 10.

 

10.1 L’Amassada Generala es l’organ sobeiran de l’Associacion e sos sòcis ne fan partida de drech pròpri e irrevocable.

 

10.2 Los sòcis de l’Associacion, reünits en session plenièra legalament constituida, decidisson de las questions que son de la competéncia de l’Amassada Generala.

 

10.3 Totes los sòcis de l’Associacion son someses a las decisions de l’Amassada Generala, compreses los absents, los que son pas d’acòrdi e los presents que se son abstenguts de votar.

 

Article 11.

 

11.1 L’Amassada Generala a las facultats seguentas:

 

a) Aprovar e modificar los estatuts e lo Reglament de Regim Intèrne.

 

b) Convocar las eleccions del Secretariat Nacional e ne fixar la data.

 

c) Examinar e aprovar, tombant lo cas, la liquidacion dels comptes annuals de l’Associacion, los budgets annuals de las recèptas e de las despensas, las escotissons de l’Associacion e lo rapòrt annual d’activitats.

 

d) Contrarotlar e aprovar, tombant lo cas, l’activitat e la gestion del

Secretariat Nacional.

 

e) Establir las orientacions generalas de l’Associacion.

 

f) Adoptar las resolucions que, per lor importància, lo Secretariat li somet.

 

g) Decidir l’incorporacion d’autras associacions, federacions o coordinacions, o lor separacion.

 

h) Demandar la declaracion d’utilitat publica o totes los autres estatuts utils pel desvolopament de l’activitat de l’Associacion.

 

i) Conéisser las règlas disciplinàrias e las ratificar, tombant lo cas.

 

j) Examinar los recorses presentats pels sòcis dins l’encastre de la procedura disciplinària, una procedura qu’es dins l’encastre de l’article 36.3 e qu’es prevista dins los estatuts.

 

k) Decidir la dissolucion e liquidacion de l’Associacion.

 

11.2 La lista de las facultats citadas çai sus a pas de caractèr enonciatiu e limita pas los poders de l’Amassada Generala.

 

Article 12.

 

12.1 L’Amassada Generala s’acampa en session ordinària almens un còp per an, dins lo periòde comprés entre los meses de mai e agost.

 

12.2 Lo Secretariat Nacional pòt convocar l’Amassada Generala, a títol extraordinari, quand o jutja apropriat, e o deu far a la demanda, e n’indicar los ponches de tractar, d’almens lo 30% dels sòcis de l’associacion. En aquel cas, l’Amassada Generala se deurà debanar dins un relambi de trenta (30) jorns a partir de la data de recepcion de la demanda.

 

Article 13.

 

13.1 L’Amassada Generala es convocada pel Secretariat Nacional. Entre la convocacion e la data de la celebracion de l’Amassada Generala i caldrà aver un relambi minimal de quinze (15) jorns.

 

13.2 La convocacion deurà èsser exprimida amb clartat, amb al minim las questions que se deuràn tractar, e mai lo jorn, lo luòc e l’ora de la tenguda de l’Amassada Generala.

 

13.3 Los organs collegials de l’Associacion se poiràn acampar per mejan de videoconferéncia o d’autres mejans de comunicacion, basta que siá garentida l’identificacion dels assistents, la continuitat de la comunicacion, la possibilitat d’intervenir dins las deliberacions e l’emission del vòte.

 

13.4 Per l’alestiment de l’Amassada Generala se nomenarà un comitat d’organizacion que sas foncions se determinaràn dins lo Reglament de Regim Intèrne. Vendrà al comitat d’organizacion de prepausar lo Reglament de l’Amassada Generala, que serà especific per caduna de sas sessions, e de lo sometre a l’aprobacion del Secretariat Nacional.

  

Article 14.

 

14.1 Un minim del 10% dels sòcis de l’associacion pòt sollicitar per escrich al Secretariat Nacional l’inclusion d’un o mai d’un ponch a l’òrdre del jorn, baste qu’o fagan dins la primièra mitat del periòde comprés entre la convocacion e la data prevista pels estatuts de l’Amassada Generala.

 

14.2 Se la demanda fa referéncia a de destitucions de las cargas del Secretariat Nacional, aquela aurà d’èstre avalorada almens pel 30% dels sòcis de l’Associacion.

 

14.3 L’incorporacion d’autres subjèctes de l’òrdre del jorn fòra del relambi indicada çai sus, deurà èsser acceptada per vòte de l’Amassada Generala coma subjècte previst.

 

Article 15.

 

15.1 L’Amassada Generala se constituís legalament amb una lista dels sòcis presents (lo 20% al minim), en limitant lo nombre de representacions (2 mandats per sòci present o representat), e devon aver una representacion globala d’un nivèl del 50%.

 

15.2 Dins las reünions de l’Amassada Generala, un vòte correspond a cada sòci acreditat en acòrdi amb lo Reglament de l’Amassada Generala.

 

15.3 Lo Reglament de Regim Intèrne establirà la procedura tocant l’exercici del vòte delegat a l’Amassada Generala de l’Associacion.

 

Article 16.

 

16.1 Las decisions de l’Amassada Generala se prenon a la majoritat simpla dels vòtes dels sòcis presents.

 

16.2 Per adoptar las decisions sus la modificacion dels estatuts, sus la dissolucion de l’Associacion, sus la constitucion d’una federacion amb d’associacions similaras o sus l’integracion dins una qu’existís ja, se requerís una majoritat qualificada del 65% dels vòtes dels sòcis presents.

 

16.3 Las eleccions se poiràn far per via electronica, a condicion que l’Associacion dispause dels mejans tecnics que garentiscan lo caractèr personal e la fisabilitat del vòte exprimit per aquela via, e que lo Secretariat Nacional o apròve, o per d’autres mejans previstes dins lo Reglament de Regim Intèrne.

 

16.4 Las decisions de l’Amassada Generala son executivas a partir del moment que son adoptadas.

 

Article 17.

 

17.1 Al començament dels acamps de l’Amassada Generala, e sus proposicion del Secretariat Nacional, se designarà lo burèu que presidirà e moderarà l’Amassada Generala.

 

17.2 Exercirà coma secretari o secretària de l’Amassada Generala la persona que complís aquela foncion al Secretariat Nacional e, en cas d’abséncia o d’impossibilitat, qualque autra persona que siá designada per l’Amassada Generala sus proposicion del Secretariat Nacional. Lo secretari redigirà lo compte rendut de cada acamp, amb un extrach de las deliberacions, lo tèxt de las decisions adoptadas e lo resultat dels vòtes. Lo compte rendut serà aprovat e signat amb la mençon “legit e aprovat” pels sòcis presents a l’Amassada Generala.

 

 

17.3 Totes los documents que tòcan las questions que seràn tractadas per l’Amassada Generala devon èsser disponibles pels sòcis dins lo sèti social a partir de la data de l’aprobacion del reglament de l’Amassada Generala.


Capítol VI. Lo Secretariat Nacional

 

Article 18.

 

18.1 Lo Secretariat Nacional (o “Secretariat”) es l’organ de conselh d’administracion que regís, administra e representa l’Associacion entre doas amassadas generalas; fa una susvelhança de las òbras dels organs que ne dependon e sosten las assembladas territorialas e las assembladas sectorialas.

 

18.2 Lo Secretariat Nacional serà compausat per un grop d’almens 9 (nòu) personas, qu’exerciràn las lors foncions d’un biais collegial.

 

18.3 Lo Secretariat nomenarà, entre los sieus sòcis, las diferentas personas qu’ocuparàn las cargas almens de presidéncia e de tresaurariá, e a títol facultatiu, de vice-presidéncia e de secretariat. Lo Secretariat nomenarà tanben un comitat permanent.

 

18.4 Dins l’eleccion dels sòcis del Secretariat, aquestes devon èsser obligatòriament sòcis de l’Assemblada Nacionala Occitana. Per necessitat e/o volontat dels sòcis, l’eleccion se farà segon la procedura electorala definida en aqueste article e desvolopat dins lo Reglament de Regim Intèrne e, tombant lo cas, per un reglament electoral.

 

La procedura electorala se fondarà sul reglament seguent:

 

a) L’Assemblada Nacionala Occitana, per sas operacions, a un camp d’accions devesit territorialament en regions. Las regions son definidas dins lo Reglament de Regim Intèrne de l’Associacion. Dintre cada region operaràn las assembladas territorialas correspondentas.

 

b) Lo Secretariat Nacional, per delegacion de l’Amassada Generala, aurà la carga de metre en plaça la tenguda de la procedura electorala, de fixar la data de las eleccions e las cargas que se deuràn aquerir.

 

18.5 Las personas elegidas intraràn en foncions après aver acceptat la carga.

 

18.6 Los sòcis del Secretariat exerciràn la lor carga a títol benevòl, e recebràn pas cap de remuneracion, malgrat l’eventual remborsament de las despensas realizadas dins l’exercici de lor foncion, que deuràn èsser obligatòriament rasonablas e justificadas. Los sòcis del Secretariat Nacional poiràn pas èsser emplegats per l’Assemblada Nacionala Occitana.

 

18.7 Se per cas l’Associacion nomena un secretari administratiu, aquel deurà participar, sens aver drech de vòte, als acamps del Secretariat Nacional, levat quand, en rason de la natura del tèma de tractar, la sieuna preséncia es pas considerada coma oportuna.

 

Article 19.

 

19.1 Los sòcis del Secretariat exerciràn la lor carga durant un periòde d’un an e òm los poirà tornar elegir.

 

19.2 La cessacion de las cargas del Secretariat abans la fin del periòde del lor mandat poirà intervenir per:

 

a) Demission volontària presentada per escrich.

 

b) Mòrt o declaracion d’abséncia.

 

c) Incapacitat o incompatibilitat subrevenguda.

 

d) Pèrda de la qualitat de sòci de l’Associacion.

 

e) Revocacion decidida per l’Amassada Generala.

 

19.3 Los pòstes laissats vacants dins lo Secretariat deuràn èsser remplaçats al primièr acamp de l’Amassada Generala. Pendent aquel temps, un autre sòci de l’Assemblada Nacionala Occitana poirà ocupar, provisòriament, la carga vacanta per cooptacion d’un minim dels tres quarts (3/4) dels sòcis del secretariat, en conformitat amb çò establit dins lo Reglament de Regim Intèrne.

 

19.4 Tot cambiament dins la composicion dels sòcis del Secretariat serà comunicat a totes los sòcis de l’Associacion dins un relambi maximal d’una setmana.

 

Article 20.

 

Lo Secretariat a los poders seguents:

 

a) Representar, dirigir e administrar l’Associacion del biais mai larg que reconeis la lei.

 

b) Respectar e aplicar las decisions presas per l’Amassada Generala.

 

c) Designar las personas que seràn pòrtavoses de l’Associacion.

 

d) Presentar lo bilanç e l’estat dels comptes de cada exercici financièr a l’Amassada Generala per aprobacion, alestir lo buget de l’exercici que ven e prepausar los escotissons de l’Assemblada Nacionala Occitana, que deuràn èsser aprovats per l’Amassada Generala.

 

e) Engatjar e licenciar los emplegats que l’Associacion pòt aver.

 

f) Adoptar la decision de convocar l’Amassada Generala e n’establir l’òrdre del jorn.

 

g) Prene las decisions necessàrias per rapòrt a las relacions amb las autras organizacions, los mèdias o lo public en general.

 

h) Establir e suprimir de comissions e grops de trabalh, de caractèr general, territorial o sectorial, e ne reglamentar lo foncionament. Una persona poirà pas coordenar ni representar mai d’una comission a l’encòp.

 

i) Supervisar la comptabilitat e lo foncionament de l’Associacion.

 

j) Organizar e signar tota mena d’actes e de contractes, que sián administratius o d’un domeni, sens prejudici de las competéncias de l’Amassada Generala.

 

k) Nomenar los sòcis de las comissions o dels grops de trabalh.

 

l) Comparéisser davant los organismes publics, exercir tota mena d’accions legalas e depausar las ressorsas apropriadas, exercir la defensa dels interèsses de l’Associacion e dels sieus sòcis. Decidir de poders per d’enseguidas judiciàrias.

 

m) Dobrir de comptes corrents e de librets d’estalvi dins tot establiment de crèdit, dispausar dels fonzes dins las condicions previstas dins l’article 35 e organizar e executar totes los autres actes e contractes relatius a la practica bancària.

 

n) Elaborar lo rapòrt annual d’activitats e lo sometre a l’aprobacion de l’Amassada Generala.

 

o) Decidir, d’un comun acòrdi amb l’assemblada territoriala correspondenta, de l’admission de novèls sòcis e de la suspension o pèrda de la qualitat de sòci de l’Associacion. Las decisions relativas a la suspension o pèrda de la qualitat de sòci per rasons disciplinàrias poiràn èsser definitivament ratificadas, modificadas o anulladas per l’Amassada Generala se lo sòci concernit i recor. Autrament, las decisions del Secretariat seràn definitivas.

 

p) Prepausar a l’Amassada Generala l’aprobacion e la modificacion del Reglament de Regim Intèrne.

 

q) Decidir tota mena de document public o privat necessari per l’execucion de sas responsabilitats.

 

Article 21.

 

21.1 Lo Secretariat Nacional, convocat precedentament per la persona en pòst a la presidéncia o aquela que la remplaça, se deu acampar en session ordinària a d’intervals establits pel Reglament de Regim Intèrne.

 

21.2 Se deu acampar en session extraordinària s’aquela es convocada a aquel títol per lo titular de la presidéncia o sollicitada per un tèrç (1/3) dels sòcis que compausan aquel organ.

 

Article 22.

 

22.1 La session plenièra del Secretariat es valida s’es estada convocada almens cinc (5) jorns abans e s’assistisson a l’acamp almens la mitat mai un dels sieus sòcis.

 

22.2 En cas d’urgéncia, lo que presidís lo Secretariat poirà convocar un acamp al minim quaranta uèch (48) oras a l’avança. En aquel cas, lo Secretariat deurà ratificar a la majoritat l’urgéncia de la session abans de començar lo tractament dels ponches incluses a l’òrdre del jorn.

 

22.3 Los sòcis del Secretariat son tenguts d’assistir a totes los acamps que i son convocats, levat se, per de causas justificadas, se’n pòdon excusar. La preséncia del president e del secretari, o de las personas que los remplaçan, es totjorn necessària.

 

22.4 Lo Secretariat pren las decisions a la majoritat simpla dels vòtes dels sòcis presents.

 

22.5 Quand los vòtes tòcan la nominacion o la destitucion de personas per las diferentas foncions de l’Associacion, cal lo vòte favorable de dos tèrces (2/3) dels sòcis presents del secretariat. En aqueles cases, lo vòte serà secret a la demanda d’almens cinc (5) sòcis del secretariat.

 

Article 23.

 

23.1 Las decisions del Secretariat deuràn èsser consignadas dins lo libre de minutas e devon èsser signadas pels lors secretari/ària e president(a).

 

23.2 Al començament de cada acamp del Secretariat, caldrà legir las minutas de la session precedenta, per aprobacion o rectificacion, tombant lo cas. La lectura es pas necessària quand lo projècte de l’acte es estat transmés als sòcis del Secretariat.


Capítol VII. La Presidéncia

 

Article 24.

 

24.1 Son del domeni de la presidéncia las foncions seguentas:

 

a) La representacion legala de l’Associacion, per delegacion de l’Amassada Generala o del Secretariat.

 

b) Presidir lo Secretariat e ne dirigir los debats, levat se s’es nomenat un burèu ad hoc per cada acamp.

 

c) Emetre un vòte de qualitat decisiva en cas d’egalitat de voses, levat se s’es nomenat un burèu ad hoc per l’acamp en question, vist que dins aquel cas lo vòte de qualitat decisiva, tombant lo cas, serà tengut pel president(a) del burèu.

 

d) Signar la convocacion dels acamps de l’Amassada Generala, amb l’acòrdi prefigurant dau Secretariat, e los acamps d’aqueste darrièr organisme.

 

e) Aprovar los actes e los certificats redigits pel secretari de l’Associacion.

 

f) L’exercici de las accions administrativas e juridicas en nom de l’Associacion.

 

g) Totas las autras foncions que pòdon èsser delegadas per l’Amassada Generala o pel Secretariat.

 

 

24.2 Lo/a president(a) serà remplaçat/da en cas d’abséncia pel vice-president(a) e, per defaut, per la persona designada pels sòcis presents a l’acamp, levat se s’es nomenat un burèu ad hoc per cada acamp en question.


Capítol VIII. Lo secretari e la tresaurariá

 

Article 25.

 

25.1 Lo/a secretari/ària a la carga de consignar los documents de l’Associacion, d’arquivar, de redigir e de signar las minutas dels acamps de l’Amassada Generala e del Secretariat, de redigir e autorizar los certificats que cal liurar, e de téner lo libre de registre dels sòcis e collaboradors de l’Associacion. Ven tanben al secretari/ària la representacion juridica de l’Associacion per los afars administratius de la procedura ordinària e, en particular, per recebre, mandar e signar tota la correspondéncia de l’Associacion.

 

25.2 Lo/a secretari/ària serà remplaçat/da, en cas d’abséncia, per la persona designada pels acampats.

 

Article 26.

 

Lo/a clavaire/a a per foncion de consignar e contrarotlar las ressorsas de l’Assemblada Nacionala Occitana, de n’elaborar lo budget, lo bilanç e la clavadura dels comptes, de téner un libre de caissa e d’autres documents de clavaire, de seguir tota l’activitat financièra de l’Associacion, inclusa la de las assembladas territorialas, e de materializar lo depaus dels revenguts dins los comptes o librets dobèrts dins los establiments de crèdit o d’estalvi. Ansin, lo clavaire a la carga d’examinar e aprovar las facturas e recebuts que l’Associacion deu pagar, e deu signar e liurar los recebuts relatius a las somas percebudas per l’Associacion.


Capítol IX. Las assembladas territorialas

 

Article 27.

 

27.1 L’Associacion s’estructurarà en assembladas territorialas. Las assembladas territorialas auràn per objècte de promòure dins lo lor territòri las finalitats de l’Assemblada Nacionala Occitana.

 

27.2 Lo camp d’accion de las assembladas territorialas generalament serà la comuna o la region definida d’un biais istoric.

 

27.3 L’estructura e lo foncionament de las assembladas territorialas seràn regulats per mejan del Reglament de Regim Intèrne.

 

27.4 Las assembladas territorialas auràn pas de personalitat juridica pròpria separada de l’Assemblada Nacionala Occitana.

 

27.5 Sens un acòrdi escrich del Secretariat, las assembladas territorialas poiràn pas, en cap de cas, pretendre representar l’ensemble de l’Associacion, ni contractar de deutes en lo sieu nom ni engatjar de personal.

 

27.6 Las assembladas territorialas, amb l’efièch de las distinguir, auràn per nom aquel del domeni territorial correspondent al vilatge, a la ciutat, al parçan o al domeni regional, segon lo cas, seguit de la mençon “per l’autodeterminacion”.

 

27.7 Las assembladas territorialas constituidas se poiràn agropar en una coordinacion regionala, correspondent a la granda region lingüistica a la quala apertenon. Aquela coordinacion regionala aurà pas qu’un caractèr organizacional e coordenaire, e las assembladas territorialas que la compausan mantendràn totas las lors competéncias.

 

27.8 Los paragrafs 2, 6 e 7 d’aquest article son pas aplicables a las assembladas exterioras.


Capítol X. Las assembladas sectorialas

 

Article 28.

 

28.1 Las assembladas sectorialas seràn formadas pels sòcis de l’Assemblada Nacionala Occitana que s’i voldràn liurament marcar per i participar, e s’estructuraràn en foncion de domenis o d’afinitats professionalas, socialas, culturalas o de tota autra mena.

 

28.2 Lo foncionament de las assembladas sectorialas se regularà segon lo Reglament de Regim Intèrne.

 

28.3 Las assembladas sectorialas, amb l’efièch de las distinguir, auràn per nom aquel correspondent a l’activitat professionala, al domeni social o a l’especialitat culturala que correspond, seguit de la mençon “per l’autodeterminacion”.

 

Article 29.

 

29.1 La tòca de las assembladas sectorialas serà de promòure las finalitats de l’Associacion a partir de la perspectiva de cadun dels diferents sectors.

 

29.2 A títol d’exemple, las foncions principalas de las assembladas sectorialas seràn las seguentas:

 

a) Estructurar e ofrir de programas de formacion dels sòcis dins l’esfèra d’interès de cada assemblada sectoriala.

 

b) Difusar e promòure las finalitats de l’Associacion entre personas e entitats extèrnas a l’Associacion, mas ligadas als camps d’accion de l’assemblada sectoriala, e assegurar lor adesion a l’Associacion.

 

c) Produire d’argumentaris e de materials de tota mena per las finalitats de formacion e de comunicacion mençonadas çai sus.

 

d) Organizar d’acamps, de conferéncias e de debats regionals o nacionals subre los avantatges de dispausar d’un estat pròpri dins l’esfèra d’interès de l’assemblada sectoriala.

 

29.3 Las assembladas sectorialas seràn pròprias a cada domeni o sector, malgrat que se pòscan estructurar en subdivisions regionalas o, tombant lo cas, sossectorialas.


Capítol XI. Lo regim economic

 

Article 30.

 

L’Assemblada Nacionala Occitana possedís pas d’actius.

 

Article 31.

 

31.1 Las ressorsas economicas de l’Assemblada Nacionala Occitana se compausan dels elements seguents:

 

a) Los escotissons dels sieus sòcis.

 

b) Las contribucions volontàrias.

 

c) Las subvencions publicas.

 

d) Las donacions, los eiretatges…

 

e) Los revenguts de son patrimòni, se n’a. Los revenguts de las sieunas activitats economicas accessòrias aprovadas pels secretariats nacional, territorials o sectorials. Aquelas activitats (merchandising, concèrts, tombòlas, eveniments de divertiment, venda de bons e causas similaras) seràn sempre subordenadas a las finalitats de l’Associacion e los sieus revenguts deuràn èsser destinats dins totes los cases exclusivament al compliment d’aquelas finalitats.

 

f) Tota autra ajuda financièra que l’Associacion poiriá percebre.

 

31.2 S’acceptarà pas las donacions de personas o entitats que refusan d’indicar la lor identitat.

 

Article 32.

 

32.1 Totes los sòcis de plen drech de l’Associacion an l’obligacion de la sosténer financièrament per mejan dels escotissons que los prepausa lo Secretariat Nacional e que los apròva l’Amassada Generala.

 

32.2 Lo contengut del lo ponch anterior s’aplica sens perjudici de l’establiment d’autras formas de participacion a l’Associacion que compòrtan pas cap obligacion de pagar un escotisson.

 

32.3 A la demanda de la majoritat del Secrétariat Nacional, o per acòrdi de l’Amassada Generala, se crearà una comission independenta que supervisarà los comptes de l’Associacion. Las personas que compliràn aquela foncion deuràn èsser de sòcis de l’entitat e aver de coneissenças comptablas acreditadas.

 

Article 33.

 

L’exercici comptable coïncidís amb l’annada civila e se clava lo 31 de decembre.

 

Article 34.

 

34.1 Dins los comptes corrents o librets d’estalvi dobèrts dins los establiments de crèdit o d’estalvi, devon figurar las signaturas del/de la president(a), del/de la clavaire/a e del/de la secretari/ària del Secretariat Nacional.

 

34.2 Per poder dispausar dels fonzes depausats dins los establiments de crèdit o d’estalvi e contractar d’engatjaments financièrs en nom de l’Associacion, caldrà almens doas signaturas autorizadas.

 

34.3 Pels comptes bancaris assignats a las assembladas territorialas, e per la disposicion de fonzes d’aqueles comptes, caldrà la signatura del coordenaire, del secretari o del clavaire de l’assemblada territoriala, los quals seràn autorizats pel/per lo/a president(a), lo/a clavaire/a e lo/a secretari/ària del Secretariat Nacional per mejan d’un certificat adreiçat a l’establiment de crèdit o d’estalvi.


Capítol XII. Lo regim disciplinari

 

Article 35.

 

35.1 Lo Secretariat pòt sancionar las infraccions comesas pels sòcis de l’Associacion.

 

35.2 Las infraccions se qualificaràn de leugièras, grèvas e fòrça grèvas, e las sancions correspondentas pòdon anar d’un avertiment fins a l’expulsion de l’Associacion, segon los tipes d’infraccion e la lor gravitat, determinats dins lo Reglament de Regim Intèrne.

 

35.3 Las proceduras disciplinàrias, que poiràn èsser completadas pel Reglament de Regim Intèrne de l’Associacion, consistiràn en:

 

a) La dobertura d’un dorsièr de procedura de part del Secretariat o coma la consequéncia d’una denóncia o comunicacion. Dins aquela fasa lo Secretariat Nacional, de comun acòrd amb l’assemblada territoriala concernida, designarà una comission instructritz.

 

b) L’instruccion de la procedura per determinar los faches subrevenguts.

 

c) L’audiéncia del contravenent presumit.

 

d) La proposicion e presentacion de pròvas, se n’i a.

 

e) Per las fins de l’instruccion, la comission d’instruccion emetrà una proposicion de resolucion.

 

f) Subre la basa de la proposicion de resolucion, lo Secretariat avisarà.

 

 

35.4 Ansin, lo Reglament de Regim Intèrne regirà los mejans de recors davant la meteissa Amassada Generala.


Capítol XIII. La dissolucion de l’Associacion

 

Article 36.

 

L’Associacion pòt èsser dissolguda a la demanda de l’Amassada Generala, convocada a títol extraordinari especialament a aquel efièch, e amb las majoritats indicadas dins l’article 16 dels presents estatuts.

 

Article 37.

 

37.1 Un còp decidida la dissolucion, s’entamena la liquidacion dels bens, dels dreches e de las obligacions de l’Associacion.

 

37.2 Lo saldo que resulta de la liquidacion, tombant lo cas, anarà a un organisme cultural de tòca non lucrativa e d’objècte similar al de l’Assemblada Nacionala Occitana.

 

37.3 Las foncions de liquidacion son la competéncia del Secretariat Nacional, convertit en comission de liquidacion, levat se l’Amassada Generala conferís aquela mission a una comission de liquidacion mai reducha e especialament designada amb aquel efièch.


Capítol XIV. Arbitratge

 

Article 38.

 

Totas las questions litigiosas e las que derivan d’aquelas, que se pausan entre l’Associacion e los sieus sòcis o entre aquestes, se someton a l’arbitratge institucional de l’Associacion Francesa d’Arbitratge (AFA) que s’encarga de la designacion d’un o tres arbitres e de l’administracion de l’arbitratge en conformitat amb son reglament.


Capítol XV. Conselh Territorial e Sectorial

 

Article 39.

 

39.1 Lo Conselh Territorial e Sectorial serà format per un representant de caduna de las assembladas territorialas o sectorialas constituidas.

 

39.2 Lo Conselh Territorial e Sectorial s’acamparà a títol ordinari a la mitat del periòde comprés entre dos acamps ordinaris de l’Amassada Generala, e a títol extraordinari quand es convocat pel Secretariat Nacional o quand o sollicita lo 15% de las assembladas territorialas, amb l’indicacion dels ponches de tractar.

 

39.3 Lo Conselh Territorial e Sectorial aurà la foncion d’interlocutor dins las discussions e l’escambi d’informacions entre lo Secretariat Nacional e los representants del territòri e de las assembladas sectorialas, e tanben de far respectar las decisions de l’Amassada Generala que lo Secretariat Nacional aplica.

 

39.4 La representacion de las assembladas territorialas o sectorialas a l’acamp del conselh territorial serà assegurada, de preferéncia, pel sieu coordenaire, que poirà èsser remplaçat per un autre sòci del secretariat territorial o sectorial.

 

39.5 La convocacion del Conselh Territorial e Sectorial serà facha pel Secretariat Nacional, e entre la convocacion e la data de la reünion del conselh i deurà aver un relambi minimal de quinze (15) jorns. Las assembladas territorialas e sectorialas mandaràn al Secretariat las lors proposicions de ponches d’incorporar a l’òrdre del jorn almens dètz (10) jorns abans la data de la reünion, e lo Secretariat anonciarà l’òrdre del jorn definitiu almens sèt (7) jorns abans la reünion del Conselh.

 

39.6 Dins lo Conselh Territorial e Sectorial, lo Secretariat Nacional farà un rapòrt sus las òbras que se son desvolopadas al cors del semèstre passat e sus los projèctes de desvolopar al cors dels sièis (6) meses avenidors, e escotarà e prendrà nòta dels comentaris que li pòdon faire los representants de las assembladas territorialas e sectorialas. Se per cas se manifèsta una majoritat de delegats opausats a una accion determinada del Secretariat, aquesta la sometrà al vòte, e se ne sortís una majoritat opausada poirà optar per la modificar o, se la vòl manténer, per convocar una Amassada Generala extraordinària per qu’aquesta decidisca.


Capítol XVI. Lo Conselh Federal de las Assembladas Nacionalas Occitanas

 

Article 40.

 

40.1 Lo Conselh Federal de las Assembladas Nacionalas Occitanas es un organ de caractèr federatiu constituit per las Assembladas Nacionalas Occitanas de l’Occitània Granda, de la Val d’Aran, de las Valadas Occitanas e la Gàrdia, de Mónegue, çò es, dels territòris occitanofòns que partejan una meteissa definicion de lor personalitat occitana.

 

40.2 Per ne far partida cal que las assembladas se reconescan recipròcament e que prevejan aquel organ dins lors estatuts respectius. En cap de cas i pòt pas aver mai d’una assemblada que represente un meteis territòri.

 

40.3 Las assembladas sòcias s’engatjan a ausir las decisions del Conselh Federal e a las adoptar, baste qu’interferiscan pas dins las estrategias d’accion de cada territòri.

 

Article 41.

 

Son de foncions del Conselh Federal de las Assembladas Nacionalas Occitanas las seguentas:

 

a) Èsser l’organ de debat e decision de las estrategias conjonchas de totes los territòris d’Occtània, sens prejudici per l’especificitat e l’estrategia particulara de cada territòri.

 

b) Representar de manièra conjoncha las assembladas que l’intègran.

 

c) Èsser un espaci comun de comunicacion e escambi que garentisca lo seguiment de las accions organizadas e dels avances complits dins los diferents territòris de la nacion occitana.

 

d) Establir e coordenar las formas de sosten a las accions de las autras assembladas sòcias.

 

e) Las autres foncions que caduna de las assembladas representadas dins lo Conselh Federal decidiscan de i transferir o de i delegar.

 

Article 42.

 

42.1 Lo Conselh Federal de las Assembladas Nacionalas Occitanas se compausa de representants de l’Assemblada Nacionala Occitana de l’Occitània Granda e de las autras assembladas que ne fan partida.

 

42.2 Aqueles representants an d’èsser sòcis de l’organ de govèrn de cada assemblada.

 

42.3 Lo nombre de representants correspondent a cada assemblada deu èsser determinat per decision conjoncha de las assembladas participant al Conselh Federal e deu assegurar la participacion de totes los territòris, de cadun dels blòcs territorials seguents:

 

— l’Occitània Granda.

— las Valadas Occitanas e la Gàrdia.

— Mónegue.

— la Val d’Aran.

 

En tot cas, lo nombre de representants de cada blòc pòt pas èsser inferior a tres (3).

 

Article 43.

 

Lo Conselh Federal de las Assembladas Nacionalas Occitanas se deu regir pel sieu reglament pròpri.

 

Article 44.

 

44.1 Lo Conselh Federal se deu reünir amb la periodicitat que lo reglament establirà, qu’en cap de cas pòt pas èsser inferior a una reünion cada tres meses.

 

44.2 Las reünions del Conselh Federal an de se far de manièra rotatòria dins de localitats dels diferents territòris representats per las assembladas.


Disposicions transitòrias

 

Primièra. Lo procès de creacion del Conselh Federal de las Assembladas Nacionalas Occitanas s’iniciarà automaticament al moment que i aurà mai d’una assemblada que ne poirà far partida, en acòrdi amb çò qu’establís l’article 40.

 

Segonda. Lo Conselh Federal se deu encargar de redigir lo sieu reglament.