Non a la repression! Libertat per lei presoniers politics catalans!

Comunicat · 02.11.2017

Aquest dijòus 2 de novembre, siá 18 jorns après l'incarceracion dei dos Jordis (Jordi Cuixart, president d'Òmnium, e Jordi Sànchez, president de l'ANC), l'estat espanhòu es anat encara mai luenh dins la repression en decidissent l'arrestacion de 9 membres dau Govèrn Catalan, en enseguent leis autrei membres que son restats a Brussèlas e en enseguent tanben lo burèu dau Parlament catalan.

 

L'Assemblada Nacionala Occitana denóncia energicament aquest grèu atac de Madrid còntra la democracia, e prèga l'Union Europèa de far pression sus lo govèrn de Mariano Rajoy per qu'arreste immediatament sa deriva autoritària indigna d'un país que se pretend democratic, e que desliure tanben totei lei presoniers politics que deten.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Sosten a l’independéncia de Catalonha e Aran

Comunicat · 10.10.2017

L’Assemblada Nacionala Occitana (ANÒC) sosten lo procès d’independéncia de Catalonha e Aran. La declaracion d’independéncia es legitima segon lo drech internacional, segon las eleccions al Parlament de Catalonha e segon lo referendum del 1r d’octòbre.

 

Lo territòri oficial de “Catalonha” compren la Val d’Aran, una zòna semiautonòma ont l’occitan es la lenga locala, oficiala e respectada. Los elegeires occitans d’Aran se son exprimits tanben per l’independéncia pendent lo referendum del 1r d’octòbre. Sostenèm aqueste movement d’emancipacion. Es un espèr per Occitània tota.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Sostenèm lo pòble catalan dins son drech a l’autodeterminacion. Sostenèm lo govèrn de Catalonha.

Comunicat · 20.09.2017

fòto: Roberto Lázaro
fòto: Roberto Lázaro

L'Assemblada Nacionala Occitana (ANÒC) sosten la populacion e las autoritats de Catalonha dins lor volontat d'independéncia. Sostenèm l'organizacion del referendum d'autodeterminacion del 1r d'octòbre de 2017.

 

Condemnam las operacions actualas de l'estat espanhòl que reprimisson los independentistas, qu'arrèstan de nauts responsables catalans, que gèlan las finanças catalanas e que frenan l'organizacion del referendum. 

 

Lo drech dels catalans de formar un estat independent es legal e etic: es lo principi d'autodeterminacion, largament reconegut dins lo drech internacional. 

 

Se Catalonha pòt pas celebrar son referendum d'autodeterminacion del 1r d'octòbre, alara lo Parlament catalan aurà tota la legitimitat per far una declaracion unilaterala d'independéncia.

 

Revendicam un estat binacional de Catalonha e Aran, ont Aran siá reconegut coma la partida occitana del futur estat. Sostenèm a tèrme l'unificacion de totes los Païses Catalans dins lo futur estat de Catalonha (Generalitat de Catalonha, Principat d'Andòrra, País Valencian, Franja, Catalonha Nòrd, Balearas).

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Solidaritat amb Barcelona e Cambrils! Alta a la terror!

Comunicat · 18.08.2017

L’Assemblada Nacionala Occitana (ANÒC) exprimís sa compassion per las victimas de las atacas terroristas de Barcelona e Cambrils, en Catalonha. Saludam los servicis de secors qu’assistisson los ferits e sostenèm las fòrças de l’òrdre que luchan contra los terroristas.

 

Portam nòstra solidaritat totala als pròches de las victimas e mai al pòble catalan que se mobiliza coratjosament contra la terror.

 

Lo pòble catalan se vei obligat d’afrontar, desenant, la violéncia òrba del grop Estat Islamic. Comprenèm aquela lucha perque aquel meteis terrorisme jihadista nos a frapats en Occitània, en particular a Niça e a Tolosa. E sèm units, pus largament, amb totas las autras populacions del Mond que luchan egalament contra la terror jihadista.

 

Las recuperacions politicianas d’aquela tragèdia son miserablas, especialament las que venon del govèrn espanhòl de M. Rajoy e de l’extrèma drecha pòstfranquista. Nos fisam del pòble catalan, qu’es arribat a una granda maturitat civica, per véncer totes aqueles obstacles e per bastir una Catalonha liura e fòrta, desbarrassada de l’òdi e de la terror.

 

***

 

Units per Occitània

 

***

 

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Eleccion presidenciala francesa 2017: la posicion de l'ANÒC

Comunicat · 19.04.2017

L’Assemblada Nacionala Occitana (ANÒC) s’exprimís sus l’eleccion presidenciala francesa de 2017 en presentant sa posicion que se resumís en quatre ponchs:

 

- L’ANÒC deplora abans tot que lo vòte blanc siá pas pres en còmpte dins lo nombre dei sufragis exprimits, e revendica sa reconeissença.

 

- Sols dos candidats declaran que vòlon sostenir la lenga occitana après respòndre a quauqueis associacions occitanistas: se tracta de Felip Poton (NPA) e de Joan Lassala. Felip Poton apond que sosten tanben lo drech d’autodeterminacion dei pòbles minorizats. L’ANÒC considèra donc Felip Poton coma lo candidat mai acceptable de totei, sens li portar pr’aquò un sosten incondicionau perque sa vision es pas jutjada pron favorabla a Occitània e a totei lei pòbles minorizats de l’Estat francés. 

 

- L’ANÒC es fòrça critica devèrs lei candidats que se presentan coma jacobins, centralistas e idolatras de la lenga francesa (çò qu’es una posicion evidenta de mesprètz còntra l’occitan, lenga en perilh de mòrt), coma Benoît Hamon, Emmanuel Macron e Jean-Luc Mélenchon. Mas denóncia sobretot lei candidats malonèsts e corromputs e/o que desvolopan d’idèas antidemocraticas e d’extrèma drecha coma l’asirança e l’autoritarisme. Per ansin, l'ANÒC demanda de barrar la rota a François Fillon, Marine Le Pen, François Asselineau e Nicolas Dupont-Aignan.

 

- Per l’ANÒC, l’eleccion presidenciala francesa es un eveniment d’importància segondària perque se compren ben qu’aurà gaire d’enjòc a respècte de la tòca primiera de l’organizacion qu’es la renaissença de la consciéncia nacionala occitana.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Manifèst per un Collectiu dels Pòbles en Lucha!

Comunicat · 18.04.2017

Dempuèi gaireben dos sègles, lo Mond viu dins una dinamica d’emancipacion dels pòbles dominats, colonizats e minorizats per las poténcias imperialistas. Long del sègle precedent, en acòrdi amb çò qu’aviá descrich e anticipat Francés Fontan (paire del nacionalisme occitan modèrne), lo Mond a assistit a la casuda de mai d’un empèri (escrancament dels empèris otoman e austroongrés, descolonizacion, casuda de l’URSS), qu’en seguida d’aquò, pro de nacions an aquerit una certana forma d’independéncia, pasmens sens que se libèren completament de la tutèla de las ancianas poténcias que las colonizavan...

 

Aquela dinamica positiva, ara mai que jamai, es actuala s’aseimam las darrièras evolucions encoratjantas que i assistissèm dins lo Mond: l’exemple de Catalonha que s’adralha vèrs l’independéncia de manièra pacifica; d’Escòcia que demanda que se faga un segond referendum sus l’autodeterminacion; l’emergéncia de la nacion curda fàcia a la quincanèla de las dictaturas nacionalistas aràbias; lo revelh de las consciéncias nacionalas dels pòbles berbèrs dintre los estats d’Africa del Nòrd; la revòlta de las nacions autoctònas d’America fàcia a lor situacion d’injustícia, rebufada, discriminacion e minorizacion; lo recent soslevament popular e massís en Güaiana contra una situacion economica e sociala insuportabla; etc.

 

Totes aqueles exemples se caracterizan per lo meteis desir fòrt dels pòbles de se liberar de las injustícias subidas, de gerir lors territòris coma o entendon, de viure lor emancipacion e de decidir d’espereles lor futur pròpri.

 

En fàcia, las abitualas poténcias expansionistas manifèstan en reaccion una agressivitat renovada: pression lingüistica de l’estat francés contra sas nacions minorizadas, opression del poder argerian contra los cabils, agression militara de Turquia contra los curds, o aquela de Russia contra Ucraïna e la minoritat tatara de Crimèa, etc.

 

Mai que jamai, lo Mond se partís entre, d’un caire, de besonhs creissents de democracia, progrès e justícia sociala e, de l’autre, de butadas contràrias d’extremismes mortifèrs. Aqueles dos fenomèns s’afrontan coma doas placas tectonicas en movement.

 

Davant aquela menaça, de causidas s’impausan d’urgéncia per una societat armoniosa e sostenabla. Ansin es primoridal que las nacions que luchan per lor existéncia, autonomia o independéncia se mòstren solidàrias. Qu’aquela solidaritat siá pas una simpla faciada mas que se concretize per d’accions realas d’escambis, de cooperacions e d’unitat.

 

Per lo futur de nòstras nacions, uniscam-nos darrièr un collectiu! Lo Collectiu dels Pòbles en Lucha!

 

Los representants dels pòbles en lucha:

 

Occitània: Martina GRÒS

Cabilia: Lamara AT CEBBI

Còrsega: Patrick SCHMITT-BAZZALI

Sicília: Rosa CASSATA

Illa de la Reünion: Bernard GRONDIN

 

Comunicat partejat per l'Assemblada Nacionala Occitana

 

***

 

Units per Occitània

 

***

 

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Barça-PSG e la leiçon catalana

Comunicat · 16.03.2017

La desfacha istorica dau París SG fàcia a l’FC Barcelona a mes en evidéncia un fach essencial: lu suportaires dei esquipas de fotbòl d'Occitània tota èran majoritàriament per Barcelona.

 

Es una realitat qu'a pas plagut a d'unu que, dins lo mitan esportiu, fustigavan l'actitud de toi aquelu que si regaudissian de l'eliminacion dau club parisenc. Segon la sieu logica, coma ciutadans de l'Estat francés, deuriam totjorn sostenir, denant de tot, li esquipas francesi en Copa d'Euròpa. 

 

Una tala logica parte dau principi faussat qu'aquela actitud "antiPSG" èra motivada basta per lo sentiment de regèt dei provinciaus còntra la capitala, ligat a un supauat complèxe d'inferioritat. Aqueu prejutjat non ten còmpte de l'esperit dich "sudista" qu'anima aquelu suportaires, aqueu mesme esperit que li fa si sentir culturalament mai pròchis dei catalans que dei parisencs.

 

Aquel esperit despassa largament l'encastre de l'espòrt e mai s'es generalament ailà que s'exprimisse mai fòrtament. D'un biais mai generau, nautres, estatjants d'Occitània tota, avèm mai d'una rason valabla per si sentir mai pròches de Barcelona que de París perque una Catalonha independenta aurà mai d'efiechs positius que l'eleccion presidenciala francesa. 

  • L'occitan es una lenga oficiala en Catalonha. La nòstra cultura li es respectada au contrari de l'Estat francés: desvolopament dei usatges administratius e educatius, dins la toponimia, dins lu mèdias, etc.
  • Barcelona es una metropòli de nivèu europèu. La centralizacion francesa a blocat lo desvolopament dei metropòlis occitani. La Catalonha independenta donarà prioritat au desvolopament de l'espaci latin centrau (País Catalans, Occitània, Aragon...). De fach, Barcelona serà una capitala economica e culturala de l'Occitània granda, de Niça a Bordèu e de Lemòtges ai Pirenèus.
  • Toi lu candidats a l'eleccion francesa propauan d'analisis parisencocentradi. La reconoissença dau fach occitan e dei sieus problèmas especifics es pas minga abordada.
  • Lu ligams occitanocatalans son frairaus, culturaus e istorics. Si retròban dins l'imne provençau Copa Santa, dins lu colors comuns roge e aur.

 

La realitat que non vòlon veire lu jacobins es aquesta: lu crits de jòia que ressonavan en Occitània tota a l'eissida dau rescòntre Barça-PSG son la pròva de l'existéncia d'una certana consciéncia nacionala occitana.

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Occitània se vòl sens masclisme!

Comunicat · 08.03.2017

Lo 8 de març es la Jornada Internacionala dels Dreches de la Femna. L'Assemblada Nacionala Occitana aprofiècha d'aquesta Jornada per manifestar son sosten total a la lucha per los dreches de las femnas dins lo mond e promòure un mond sens masclisme. 

 

L'ANÒC parteja l'eslogan d'Iniciativa per Occitània: "Per far d'Occitània un país sens masclisme!"

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Per l'unitat d'accion dels pòbles autoctòns

Comunicat · 14.02.2017

 

[Comunicat comun dels representants dels pòbles autoctòns occitan, cabil, còrs, sicilian e reünionés]

 

La civilizacion actuala, en nom de las «valors», dels dreches umans o de l’egalitat per totes, destrutz o eradica las culturas autoctònas.

 

Lor mòrt es estada programada lo pus sovent al sègle XX, quand los governants, jos pretèxt d’eficacitat, an comprés que caliá parlar pas que d’una sola votz e un sol accent. Èra lo règne del jacobinisme. Alara avèm parlat francés, anglés, espanhòl, rus, han… de lengas que se son impausadas sus un territòri estatal e non nacional.

 

Dins los estats sortits del colonialisme, l’etnia qu’a pres lo poder a impausat sa lenga a las autras, e, quand èra tròp complicat, s’es gardada la lenga del colonizaire. La necessitat d’eficacitat a crescut amb l’evolucion de l’economia e l’aveniment del capitalisme financièr apatrida que recèrca pas que lo profièch maximal a tèrme cort. Los govèrns son someses a son diktat o accèptan sos concèptes sens reganhar. Dins la granda mutacion que s’enseguís, l’òme es pas pus qu’un pedon que l’òm desplaça a volontat. Sa tòca es de desraiçar los òmes per fin de los destabilizar e los rendre servils.

 

En Euròpa, en Africa, en Orient Mejan, en Asia, en America, de pòbles se baton per la reconeissença de lor lenga, de lor civilizacion e demandan lor ensenhament a paritat amb la lenga dominanta. D’autres se baton per l’autonomia e l’independéncia.

 

Es urgent per nosautres, pòbles autoctòns, de nos solidarizar e de nos unir per combatre lo negacionisme d’estat que siá jacobin, religiós o autre. Avèm pas res d’esperar de las instàncias internacionalas manipuladas per las poténcias. Bastissèm un grand movement revendicatiu e manifestam lo meteis jorn per exprimir nòstra ràbia e nòstra volontat de viure, que volèm trabalhar al país dins la solidaritat, la fraternitat e la dignitat, sus nòstre sòl e amb nòstra lenga.

 

Los representants dels pòbles autoctòns en lucha:

 

Cabilia: Lamara AT CEBBI (sòci de l'ANÒC)

Occitània: Francís TIMONER

Còrsega: Patrick SCHMITT-BAZZALI

Sicília: Rosa CASSATA

Illa de la Reünion: Bernard GRONDIN

 

Comunicat partejat per l'Assemblada Nacionala Occitana

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


Lo militant sobeiranista cabil Lamara At Cebbi aderís a l'ANÒC!

Comunicat · 07.02.2017

L’Assemblada Nacionala Occitana es urosa d'aculhir d'entre los sieus novèls sòcis lo militant sobeiranista cabil Lamara  At Cebbi! 

 

Lamara At Cebbi (en grafia coloniala algeriana Lamara Aït Chebib) es lo director d’Amendil Awray (Riban Jaune), una associacion dedicada a la libertat del pòble cabil en solidaritat amb los autres pòbles en lucha, a l’egalitat dels sèxes e a l’eliminacion de la violéncia fondada sul sèxe.

 

L’adesion de Lamara At Cebbi a l’ANÒC constituís un simbòl fòrt de la solidaritat qu'unís los pòbles occitan e cabil e se marca, al nivèl universal, dins lo combat pacific per l’emancipacion e l'unitat d'accion dels pòbles autoctòns.

 

Desiram doncas la benvenguda a nòstre novèl sòci Lamara At Cebbi e exprimissem per la meteissa escasença tota la nòstra solidaritat de cap al pòble cabil.

 

Viva l’amistat occitano-cabila!

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


L'ANÒC saluda lo succès de la manifestacion davant lo MUCÈM!

Comunicat · 08.01.2017

 

Es emb granda jòia que constatam que lo Musèu dei Civilizacions d'Euròpa e de la Mediterranèa a Marselha (MUCÈM) presenta ara tanben en occitan l'article 14 de la Declaracion Universala dei Drechs Umans : "Còntra lei persecucions cadun a drech de cercar asil e de beneficiar de l’asil dins d’autrei país"!

 

 

Per rampèu, fins a ara, lei parets de veire dau MUCÈM presentavan lo tèxt d'aquel article en sèt lengas, d'entre aquelei i aviá ges d'occitan.

 

Lo 17 de decembre passat, una còla de militants occitanistas menèt un accion davant lo sit per demandar qu'aquel article siágue revirat tanben en occitan, qu'es la lenga dau país. Se creèt tanben una peticion en linha per apielar aquela reivendicacion.

 

Leis esfòrç se son revelats fruchós : Lo MUCÈM a apondut despuèi sus sa paret de veire una version dau tèxt de l'article en occitan! Bastèt d'un quinzenat de personas, d'una accion positiva e d'una peticion clara per far reagir la direccion dau museu au profiech de la visibilitat de l'occitan!

 

L'Assemblada Nacionala Occitana (ANÒC) felicita totei lei militants que son a l'iniciativa d'aquela accion e que i an participat! 

 

Lor capitada es una excellenta nòva a mai d'un títol : au-delà dau fach que s'agís d'una victòria importanta, aquò mòstra tanben qu'es possible de faire bolegar lei causas en favor de la reconeissença de l'occitanitat de la region amb de mejans limitats!

 

Es una nòva encoratjanta a respecte dei dificultats qu'an tocat lo militantisme occitan aquelei darriers temps, sobretot en Provença.

 

Aquò nos convenç encara mai que cau obrar per l'unitat de totei lei personas que son animadas per la consciéncia d'èstre occitanas, perqué mai units serem, mai fòrts devendrem. Units per Occitània, tau es nòstre eslogan!

 

L'ANÒC s'es creada ja esquasi un an fa (lo 20 de febrier 2016) dins la tòca d'amassar totei lei fòrças vivas de la societat occitana per restaurar la dignetat nacionala occitana. Aquesta dignetat se manifesta en promier luec per la reconeissença de l'occitanitat dei regions de lenga e de cultura d'Òc!

 

Siam sus lo bòn camin per la renaissença nacionala occitana! D'autrei combats, accions e succès nos esperan e que sauprem menar toteis amassa! 

 

***

 

Units per Occitània

 

***

  

ASSEMBLADA NACIONALA OCCITANA

Residéncia Bèla Auròra - 18 bis Carriera Santa Estela

13090 AIS DE PROVENÇA

Sit: www.assemblada.org

E-mail: info@assemblada.org

Telefòn: +33 6 46 62 74 93


L’Assemblada Nacionala Occitana vos augura una Bona Annada 2017

Comunicat · 01.01.2017

L'Assemblada Nacionala Occitana vos augura una Bona Annada 2017!

 

2016 a vist la naissença de l'ANÒC e sa bastison!

 

2017 veirà lo sieu desvolopament!

 

En 2017, contunharem lo camin de la lucha amb nòstre eslogan:

 

UNITS PER OCCITÀNIA !